నిద్ర ప్రతి జీవికి ఎంత ముఖ్యమో తెలిసిందే కదా. అయితే కొందరు పనిలో అలాగే ఒత్తిడి వలన సరిగా నిదరపోలేకపోతుంటారు. అయితే పని ఒత్తిడితో అలసిపోయిన వారు వీకెండ్ లో తగినంత ఎక్కువ నిద్ర పొతే మంచిదే అని అధ్యయనాలు చెబుతున్నాయి. వారమంతా నిద్రలేమితో బాధపడేవారు వీకెండ్లో కాసేపు అదనంగా పడుకోవడం వల్ల గుండె జబ్బులు వచ్చే ప్రమాదం గణనీయంగా తగ్గుతుందని అనేక అంతర్జాతీయ అధ్యయనాలు స్పష్టం చేస్తున్నాయి. యూరోపియన్ సొసైటీ ఆఫ్ కార్డియాలజీ వంటి ప్రముఖ సంస్థలు నిర్వహించిన పరిశోధనల ప్రకారం, వారంలో కోల్పోయిన నిద్రను వీకెండ్లో భర్తీ చేసుకునే వారిలో గుండెపోటు, స్ట్రోక్ వంటి తీవ్రమైన సమస్యలు వచ్చే అవకాశాలు దాదాపు 20% వరకు తక్కువగా ఉంటాయని స్పష్టమవుతోంది. నిరంతరం నిద్ర సరిపోకపోవడం అనేది గుండె ఆరోగ్యానికి తీవ్రమైన ముప్పు తెచ్చిపెడుతుంది. రోజుకు 6 గంటల కంటే తక్కువ నిద్రపోయే వారిలో రక్తపోటు (BP) పెరగడం, హార్ట్ బీట్ చేంజెస్ మరియు రక్తనాళాల్లో వాపు ఏర్పడటం వంటి సమస్యలు వచ్చే ప్రమాదం ఉంది. ఇక క్రమంగా ఇది గుండెనాళాల జబ్బులకు దారితీసే అవకాశం ఉంది. అందుకే, వారంలో సరిగా నిద్రపోలేని వారికి ఈ నష్టాన్ని వీకెండ్ నిద్ర కొంతవరకైనా నివారిస్తుందని నిపుణులు సూచిస్తున్నారు. మనం ప్రశాంతంగా నిద్రపోతున్నప్పుడు మన శరీరంలో ఒత్తిడిని కలిగించే ‘కోర్టిసాల్’ (Cortisol) హార్మోన్ స్థాయిలు తగ్గుతాయి. వారమంతా పని ఒత్తిడితో పెరిగిన బీపీ, హృదయ స్పందన రేటు వీకెండ్లో తీసుకునే అదనపు నిద్ర వల్ల తిరిగి సాధారణ స్థితికి వస్తాయి. ఈ తాత్కాలిక విశ్రాంతి వల్ల గుండెపై పడే అదనపు భారం తగ్గి, రక్తనాళాలు రిలాక్స్ అవ్వడానికి అవకాశం లభిస్తుందని చెబుతున్నారు. నిద్ర సరిపోక పోవడం అనేది కేవలం గుండెపైనే కాకుండా శరీర జీవక్రియల (Metabolism) పైన కూడా ప్రతికూల ప్రభావం చూపుతుంది. సరిపడా నిద్ర లేకపోతే టైప్-2 మధుమేహం మరియు బరువు పెరిగే ప్రమాదం ఉంటుంది. ఊబకాయం, షుగర్ వ్యాధి రెండూ గుండె జబ్బులకు ప్రధాన కారణాలు. వీకెండ్లో సరిపడా నిద్రపోవడం జీవక్రియలు మెరుగుపడి, పరోక్షంగా గుండె జబ్బుల బారిన పడకుండా ఉండటానికి దోహదం చేస్తుంది.
అయితే వీకెండ్లో ఎక్కువసేపు నిద్రపోవడం వల్ల గుండెకు మంచిదే అయినా ఇది ప్రతిరోజూ క్రమం తప్పకుండా పోయే నిద్రకు పూర్తి ప్రత్యామ్నాయం కాదని కూడా నిపుణులు హెచ్చరిస్తున్నారు. వారమంతా కేవలం 4 లేదా 5 గంటలు మాత్రమే పడుకుని, శని-ఆదివారాల్లో 10 నుండి 12 గంటలు పడుకోవడం వల్ల శరీర ‘సిర్కాడియన్ రిథమ్’ (Biological Clock) దెబ్బతింటుంది. దీన్ని ‘సోషల్ లాగ్’ అని పిలుస్తారు, ఇది దీర్ఘకాలంలో శరీరానికి మంచిది కాదని చెబుతున్నారు. ప్రతి మనిషికి రోజుకు 7 నుండి 8 గంటల నాణ్యమైన నిద్ర అవసరం. కేవలం వీకెండ్స్లోనే కాకుండా వారంలోని అన్ని రోజులు ఒకే సమయానికి పడుకోవడం, ఒకే సమయానికి మేల్కోవడం ఆరోగ్యానికి అత్యంత ఉత్తమమని వైద్యులు సూచిస్తున్నారు. రాత్రి వేళల్లో నిద్రపోవడానికి ముందు మొబైల్ ఫోన్లు, టీవీలు చూడకపోవడం, కెఫిన్ (కాఫీ, టీ) తీసుకోకపోవడం వల్ల మంచి నిద్ర పడుతుంది. అందుకే రోజూ నిద్రపోవాల్సిన సమయాన్ని నిర్లక్ష్యం చేయకుండా తగిన సమయం నిద్ర పోవాలి. ప్రతిరోజూ తగినంత నిద్ర, సమతుల్యమైన ఆహారం తీసుకోవడం మరియు క్రమం తప్పకుండా వ్యాయామం చేయడమే గుండెను నిరంతరం ఆరోగ్యంగా ఉంచుతుంది.