మహిళలు మన సమాజానికి పునాది అని కుటుంబాలను తీర్చిదిద్దడం నుండి దేశాన్ని నిర్మించడం వరకు వారి పాత్ర అమూల్యమని ఏపీ డిప్యూటీ సీఎం పవన్ కళ్యాణ్ అన్నారు. నేడు భారత్ ప్రతి రంగంలోనూ ఎదుగుతున్న నారీ శక్తిని వేడుక చేసుకుంటోందన్నారు. ‘ఎక్స్’ లో ఆయన ఒక పోస్ట్ చేశారు. సైప్రస్లో జరిగిన ఫిడే చెస్ ఉమెన్స్ కాండిడేట్స్ టోర్నమెంట్ను గెలుచుకోవడం ద్వారా ఆర్. వైశాలి చరిత్ర సృష్టించిన విషయాన్ని పేర్కొన్నారు. తద్వారా మహిళల ప్రపంచ చెస్ ఛాంపియన్షిప్ కోసం పోటీపడే హక్కును పొందిన మొదటి భారతీయ మహిళగా ఆమె నిలిచారన్నారు. చదరంగం బోర్డు నుండి ఒలింపిక్ వేదిక వరకు, భారతీయ మహిళలు దేశానికి స్ఫూర్తినిస్తూనే ఉన్నారని భారత రాష్ట్రపతి శ్రీమతి ద్రౌపది ముర్ము నాయకత్వంలో బలోపేతమైన పాలన మరియు ప్రజా సేవ నుండి, భారత అంతరిక్ష యాత్రలలో రీతూ కరిధాల్ శాస్త్రీయ నైపుణ్యం వరకు, ఒలింపిక్ కీర్తిని తెచ్చిన పి.వి. సింధు, చారిత్రాత్మక విజయాలతో దేశం గర్వపడేలా చేసిన మీరాబాయి చాను, మరియు ప్రపంచ బాక్సింగ్ వేదికపై సత్తా చాటుతున్న నిఖత్ జరీన్ కనబరుస్తున్న క్రీడా నైపుణ్యం వరకు ప్రతి ఒక్కరిదీ విశిష్ట పాత్రని కొనియాడారు. సాధికారత దిశగా సాగుతున్న ఈ ప్రయాణం భారతదేశ రాజ్యాంగ పునాదులలో లోతుగా పాతుకుపోయిందని భారత రాజ్యాంగ రూపకల్పనలో కీలక పాత్ర పోషించిన దాక్షాయణి వేలాయుధన్, హన్సా మెహతా, దుర్గాబాయి దేశ్ ముఖ్, విజయలక్ష్మి పండిట్ మరియు రాజకుమారి అమృత్ కౌర్ వంటి రాజ్యాంగ నిర్మాతలు, రాబోయే తరాల భారతీయ మహిళలకు గౌరవం, సమానత్వం మరియు న్యాయాన్ని అందించేలా కృషి చేశారని గుర్తు చేశారు. ఈ విజయాలన్నీ ఒక శక్తివంతమైన సత్యాన్ని చాటి చెబుతున్నాయన్న పవన్ ప్రతిభకు అవకాశం తోడైనప్పుడు, మహిళలు నాయకత్వం వహిస్తారు, రాణిస్తారు మరియు దేశానికే స్ఫూర్తిగా నిలుస్తారని పేర్కొన్నారు. ఈ స్ఫూర్తితోనే ప్రధాని మోడీ నాయకత్వంలో నారీ శక్తి వందన్ సవరణ బిల్లు 2026ను ప్రవేశపెట్టడం ఒక చారిత్రాత్మక అడుగని స్పష్టం చేశారు. శాసనసభల్లో మహిళలకు 33% రిజర్వేషన్లు కల్పించడం ద్వారా పాలనలో వారికి దక్కాల్సిన సరైన స్థానాన్ని ఇది ఖాయం చేస్తుందన్నారు. జనసేన పార్టీ ఎల్లప్పుడూ మహిళా సాధికారతకు కేవలం మాటల్లోనే కాకుండా చేతల్లో కూడా కట్టుబడి ఉందని తెలిపారు. 2019 ఎన్నికలలో మేము హామీ ఇచ్చినట్లుగా, మహిళలకు 33% రిజర్వేషన్ల పట్ల మాకున్న నిబద్ధత, సమాన అవకాశాలు మరియు సరైన ప్రాతినిధ్యంపై ఉన్న నమ్మకానికి అద్దంపడుతుందన్నారు. ఒక మహిళ ఎదిగినప్పుడు, దేశం ఎదుగుతుంది. ఇది వారికి కొత్త హక్కులను కల్పించడం గురించి కాదు; వారికి చెందాల్సిన గౌరవాన్ని వారికి తిరిగి ఇవ్వడం గురించని పేర్కొన్నారు. బలమైన మహిళలు బలమైన కుటుంబాలను నిర్మిస్తారు.బలమైన కుటుంబాలు బలమైన దేశాన్ని నిర్మిస్తాయని స్పష్టం చేశారు. ఇక నుండి, ‘నారీ శక్తి’ అనేది కేవలం ఒక నినాదం మాత్రమే కాదని అది మన నాగరికత యొక్క బలమై నిలుస్తుందన్నారు. శక్తి స్ఫూర్తితో న్యాయమైన, సమానమైన మరియు సాధికారత కలిగిన భారతదేశాన్ని నిర్మించేందుకు మనమందరం కలిసి ముందుకు సాగుదామని పిలుపునిచ్చారు.
