తెలుగు సినీ పరిశ్రమలో కొన్ని కాంబినేషన్లు ప్రేక్షకుల హృదయాల్లో ఎప్పటికీ ప్రత్యేక స్థానం సంపాదించుకుంటాయి. అలాంటి అరుదైన కాంబినేషన్లలో విక్టరీ వెంకటేష్ – త్రివిక్రమ్ శ్రీనివాస్ కాంబినేషన్ ఒకటి. గతంలో వీరిద్దరూ కలిసి చేసిన సినిమాలు ప్రేక్షకులకు నవ్వులు పంచడమే కాదు, కుటుంబ ప్రేక్షకులకు చిరస్థాయిగా గుర్తుండిపోయే అనుభూతిని కూడా ఇచ్చాయి. ముఖ్యంగా నువ్వు నాకు నచ్చావ్, మల్లీశ్వరి వంటి చిత్రాలు ఇప్పటికీ టీవీలో వస్తే ప్రేక్షకులు ఆసక్తిగా చూసే స్థాయిలో క్లాసిక్ హిట్స్గా నిలిచాయి. ఆ సినిమాల్లో వెంకటేశ్ కామెడీ టైమింగ్కు త్రివిక్రమ్ రాసిన డైలాగులు ప్రాణం పోశాయి. అయితే అప్పట్లో త్రివిక్రమ్ రచయితగా మాత్రమే పనిచేశారు. ఇప్పుడు స్టార్ డైరెక్టర్గా ఎదిగిన తర్వాత వెంకటేశ్తో పూర్తి స్థాయి సినిమా చేయడం అభిమానుల్లో భారీ అంచనాలను పెంచుతోంది. ప్రస్తుతం వీరిద్దరి కలయికలో తెరకెక్కుతున్న చిత్రం ఆదర్శ కుటుంబం టైటిల్ వినగానే ఇది ఒక ఫ్యామిలీ ఎంటర్టైనర్ అనిపించినా, ఇందులో యాక్షన్, ఎమోషన్, సస్పెన్స్, కామెడీ అన్నీ ఉండబోతున్నాయని సినీ వర్గాలు చెబుతున్నాయి. ముఖ్యంగా ఈ సినిమా కోసం త్రివిక్రమ్ చాలా కొత్త కథను సిద్ధం చేసినట్లు సమాచారం. ఫ్యామిలీ డ్రామాను తన మార్క్ స్టైల్లో చెప్పడంలో ఆయనకు ప్రత్యేకమైన గుర్తింపు ఉంది. ఇప్పుడు అదే శైలిలో, కానీ కొత్త బ్యాక్డ్రాప్తో ప్రేక్షకుల ముందుకు రాబోతున్నారని టాక్ వినిపిస్తోంది.ఈ చిత్రాన్ని హారికా & హాసినీ క్రియేషన్స్ సంస్థ అత్యంత ప్రతిష్టాత్మకంగా నిర్మిస్తోంది. భారీ బడ్జెట్తో తెరకెక్కుతున్న ఈ చిత్రంపై ఇండస్ట్రీలో ఇప్పటికే పాజిటివ్ బజ్ ఏర్పడింది. వెంకటేశ్ అభిమానులు మాత్రమే కాదు, కుటుంబ ప్రేక్షకులు కూడా ఈ సినిమా కోసం ఎంతో ఆసక్తిగా ఎదురుచూస్తున్నారు. ఎందుకంటే వెంకటేశ్కు ఫ్యామిలీ ఆడియన్స్లో ఉన్న క్రేజ్ సంగతి తెలిసిందే కదా. ఇక ఈ సినిమాకు సంబంధించిన ఒక ఆసక్తికరమైన వార్త ఇప్పుడు సోషల్ మీడియాలో వైరల్ అవుతోంది. సినిమాలో వెంకటేశ్ పాత్రకు సంబంధించిన ఫ్లాష్బ్యాక్ ఎపిసోడ్ చాలా ప్రత్యేకంగా ఉండబోతుందట. అందులో వెంకటేశ్ ఒక శక్తివంతమైన ‘రా ఏజెంట్’ పాత్రలో కనిపించనున్నారని సమాచారం. ఇప్పటి వరకు వెంకీ ఎన్నో పాత్రలు చేశారు కానీ ఈ తరహా పాత్రలో ఆయన కనిపించడం అభిమానులకు కొత్త అనుభూతిని ఇవ్వబోతోందని అంటున్నారు. అయితే ఈ పాత్రలో ఉన్న అసలు ట్విస్ట్ మరింత ఆసక్తికరంగా మారింది. కథ ప్రకారం వెంకటేశ్ పాత్రకు దృష్టి లోపం ఉంటుందట. ఒక రహస్య ఏజెంట్గా దేశ భద్రత కోసం పని చేస్తూనే, తన వ్యక్తిగత సమస్యను అధిగమిస్తూ శత్రువులను ఎలా ఎదుర్కొన్నాడు? అనే అంశాన్ని త్రివిక్రమ్ చాలా ఆసక్తికరంగా రాసినట్లు తెలుస్తోంది. ఒకవైపు థ్రిల్లింగ్ యాక్షన్ సన్నివేశాలు, మరోవైపు నవ్వులు పంచే ఎంటర్టైన్మెంట్ సమపాళ్లలో ఉండేలా కథను డిజైన్ చేశారట. త్రివిక్రమ్ సినిమాల్లో డైలాగులు ఎంత ముఖ్యమో అందరికీ తెలిసిందే. సాధారణ విషయాన్ని కూడా ఎంతో లోతుగా, హాస్యంతో చెప్పగలిగే ప్రత్యేక శైలి ఆయనది. ఇప్పుడు వెంకటేశ్ లాంటి అద్భుతమైన టైమింగ్ ఉన్న నటుడు ఆయన డైలాగులు చెబితే, ఆ మ్యాజిక్ మరోసారి వెండితెరపై కనిపించబోతోందని అభిమానులు భావిస్తున్నారు. ముఖ్యంగా ఫ్యామిలీ సీన్స్లో వచ్చే భావోద్వేగాలు, కామెడీ సన్నివేశాలు సినిమాకు హైలైట్ అవుతాయని సమాచారం. ఈ సినిమాలో హీరోయిన్ గా శ్రీనిధి శెట్టి నటిస్తోంది. ప్రస్తుతం సినిమా షూటింగ్ వేగంగా జరుగుతోంది. ప్రతి సన్నివేశం నాణ్యంగా రావడానికి త్రివిక్రమ్ ప్రత్యేక శ్రద్ధ తీసుకుంటున్నట్లు సమాచారం. షూటింగ్లో ఎక్కడా రాజీ పడకుండా, విజువల్స్ నుంచి డైలాగ్స్ వరకు ప్రతి అంశాన్ని ఎంతో జాగ్రత్తగా రూపొందిస్తున్నారట. వెంకటేశ్ కూడా ఈ పాత్ర కోసం ప్రత్యేకంగా సిద్ధమవుతున్నట్లు తెలుస్తోంది.ఈ చిత్రాన్ని ఈ ఏడాది దసరా కానుకగా విడుదల చేయాలని మేకర్స్ ప్లాన్ చేస్తున్నారు. దసరా సీజన్ అంటే కుటుంబ ప్రేక్షకులు థియేటర్లకు ఎక్కువగా వచ్చే సమయం. వెంకటేశ్ ఫ్యామిలీ ఎంటర్టైనర్స్కు ఈ సీజన్ ఎప్పుడూ బాగా కలిసొచ్చింది. అందుకే ఈ సినిమాపై భారీ అంచనాలు నెలకొన్నాయి.
