భారీ నౌకలకే వణుకు పుట్టిస్తున్న ‘మస్కిటో ఫ్లీట్’!

ప్రపంచంలోనే అత్యంత శక్తివంతమైన అమెరికా నౌకాదళాన్ని, ఇరాన్ తన చిన్న చిన్న పడవలతో ఉక్కిరిబిక్కిరి చేస్తోంది. అదే ఇరాన్ వ్యూహాత్మక ‘మస్కిటో ఫ్లీట్’. అగ్రరాజ్యం అమెరికా, ఇరాన్ మధ్య ఉద్రిక్తతలు కొనసాగుతూనే ఉన్నాయి. ప్రపంచ వాణిజ్యానికి కీలకమైన హోర్ముజ్ జలసంధి వేదికగా ఇరు దేశాలు సవాలు విసురుకుంటున్నాయి. సముద్ర మార్గాన్ని తెరిపించేందుకు అమెరికా ‘ప్రాజెక్ట్ ఫ్రీడమ్’ పేరుతో వ్యూహాలు రచిస్తుంటే, ఇరాన్ మాత్రం పట్టు వదలడం లేదు. ఇక్కడే ఒక ఆసక్తికరమైన విషయం ఏమిటంటే, అమెరికా వంటి అగ్రరాజ్య సైనిక బలగాల వెన్నులో వణుకు పుట్టిస్తున్నది భారీ యుద్ధ నౌకలు కావు. ‘మస్కిటో ఫ్లీట్’ అని పిలిచే ఒక సరికొత్త రక్షణ వ్యూహం ఇప్పుడు ప్రపంచాన్ని ఆశ్చర్యపరుస్తోంది. ఇరాన్ సిద్ధం చేసిన ఈ వినూత్న నౌకాదళం పశ్చిమ దేశాల నిపుణులను సందిగ్ధంలో పడేసింది. మస్కిటో ఫ్లీట్ అనగానే ఇవి నిజమైన దోమల సమూహమని కాదు. ఇది ఇరాన్ అధికారిక సైనిక విభాగం పేరు కూడా కాదు, కేవలం వెస్ట్రన్ నిపుణులు పెట్టిన పేరు మాత్రమే. ఇరాన్ ఇస్లామిక్ రివల్యూషనరీ గార్డ్ కార్ప్స్ ఉపయోగిస్తున్న వందలాది చిన్న, అత్యంత వేగవంతమైన స్పీడ్ బోట్ల సమూహమే ఈ ఫ్లీట్. భారీ అమెరికన్ యుద్ధనౌకలను ఇవి చుట్టుముట్టి ఉక్కిరిబిక్కిరి చేసే తీరు అద్భుతం. రాడార్ల కంటికి కూడా చిక్కకుండా ఇవి చేసే విన్యాసాలు అమెరికా రక్షణ వ్యూహాలకు సవాలు విసురుతున్నాయి. పరిమాణంలో చిన్నవైనా, ఇవి కలిగించే నష్టం మాత్రం ఊహించని స్థాయిలో ఉంటుంది. అందుకే వీటికి ఈ పేరు సరిగ్గా సరిపోతుంది.ఈ వినూత్న వ్యూహాం 1980ల నాటి ఇరాక్ యుద్ధ కాలంలోనే పురుడు పోసుకుంది. భారీ యుద్ధ నౌకలను నిర్మించడం కంటే, శత్రువుల కంటికి చిక్కని చిన్న ఆయుధ వ్యవస్థలే మేలని ఇరాన్ గ్రహించింది. ఖరీదైన వ్యవస్థల కంటే తక్కువ ఖర్చుతో ఎక్కువ నష్టం కలిగించే మార్గాలను వారు ఎంచుకున్నారు. దాదాపు 10 టన్నుల బరువుండే ఇటువంటి 1,500 ఫాస్ట్ బోట్లను ఇరాన్ రంగంలోకి దించింది. ఇవి చిన్నవిగా ఉండటం వల్ల శత్రువుల ఆధునిక రాడార్ వ్యవస్థలు వీటిని సులభంగా గుర్తించలేవు. వందల మిలియన్ డాలర్ల ఖరీదైన అమెరికా యుద్ధ నౌకను నాశనం చేయడానికి ఇరాన్ కేవలం కొన్ని వేల డాలర్లే ఖర్చు చేస్తోంది. అత్యంత తక్కువ ఖర్చుతో అగ్రరాజ్యాన్ని ఇరాన్ వణికిస్తోంది.హోర్ముజ్ జలసంధి చాలా ఇరుకైన మార్గం కావడం ఇరాన్‌కు కలిసివచ్చే అంశం. ఇక్కడ పెద్ద పెద్ద యుద్ధనౌకలు వేగంగా దిశను మార్చుకోవడం చాలా కష్టంతో కూడుకున్న పని. ఈ బలహీనతను ఆసరాగా చేసుకుని ఇరాన్ కామికేజ్ సూసైడ్ డ్రోన్లను రెడీ చేసింది. ఇవి అత్యంత ప్రమాదకరమైనవి మరియు శత్రువుల సోనార్ల కంటికి చిక్కకుండా నీటిపై ప్రయాణిస్తాయి. సుమారు 200 కిలోల పేలుడు పదార్థాలను మోసుకెళ్తూ నేరుగా వెళ్లి లక్ష్యాన్ని ఢీకొంటాయి. ఇటీవల జరిగిన ఒక దాడిలో అమెరికా నౌకను ఇటువంటి డ్రోన్ ఢీకొట్టడంతో ఒక భారతీయుడు కూడా మరణించాడు. ఈ ఆత్మాహుతి డ్రోన్లు సముద్రంపై మృత్యువులా తిరుగుతున్నాయి. వీటిని ఎదుర్కోవడం అమెరికా నావికాదళానికి పెను సవాలుగా మారింది.ఇరాన్ కేవలం దాడులకే కాకుండా నిఘా కోసం కూడా ప్రత్యేక డ్రోన్లను ఉపయోగిస్తోంది. ఇవి అమెరికా యుద్ధ నౌకల కదలికలను అత్యంత రహస్యంగా ఫోటోలు తీసి కంట్రోల్ రూమ్‌కు చేరుస్తాయి. ప్రతి కదలికను కనిపెడుతూ అమెరికా వ్యూహాలను ఇరాన్ చిత్తు చేస్తోంది. వీటితో పాటు సముద్రంలో పరచిన మందుపాతరలను గుర్తించే ‘ఖైబర్’ వంటి డ్రోన్లు కూడా ఉన్నాయి. నిఘా వ్యవస్థ బలంగా ఉండటం వల్ల ఇరాన్ దాడులు అత్యంత ఖచ్చితంగా ఉంటున్నాయి. ఇరాన్ వద్ద దాదాపు 300 మిసైల్ బోట్లు సిద్ధంగా ఉన్నాయి. వీటిపై ‘నాసర్‌’, ‘కౌసర్‌’ వంటి షార్ట్ రేంజ్ సూపర్‌సోనిక్ గైడెడ్ క్షిపణులను అమర్చారు. ఇవి అతి సమీపం నుండి శత్రు నౌకలపై మిస్సైల్స్ కురిపించే కెపాసిటీ కలిగి ఉంటాయి. అమెరికా నౌకలు వీటిని గుర్తించే లోపే దాడి జరిగిపోతుంది. వేగంగా దూసుకువచ్చే ఈ బోట్లు మెరుపు దాడులకు మారుపేరుగా మారాయి. ప్రతి బోటు ఒక చిన్న యుద్ధనౌకలా ప్రవర్తిస్తూ విధ్వంసాన్ని సృష్టిస్తుంది. అమెరికా సైన్యం ఈ వేగాన్ని తట్టుకోవడానికి నానా తంటాలు పడుతోంది.ఇరాన్ బలగాల వద్ద ‘అజదార్’ అనే మానవరహిత అండర్ వాటర్ వెహికల్ ఉంది. ఇది నీటి అడుగున ప్రయాణిస్తుంది కాబట్టి ఎయిర్ స్పేస్ నుండి దీనిని గుర్తించడం దాదాపు అసాధ్యం. ఇది ఒక రహస్య ఆయుధంలా అమెరికా నౌకల పునాదులను దెబ్బతీస్తుంది. నీటి పైన మస్కిటో ఫ్లీట్ ఉంటే, నీటి అడుగున ఈ అజదార్ నిఘా ఉంటుంది. రాడార్లకు చిక్కని ఈ వాహనం సైలెంట్ కిల్లర్‌లా పనిచేస్తుంది. అమెరికా ఆధునిక టెక్నాలజీ కూడా దీని ముందు తలవంచక తప్పడం లేదు. అజదార్ చేసే విన్యాసాలు రక్షణ నిపుణులకు పెద్ద తలనొప్పిగా మారాయి. ఇది కేవలం ఒక వాహనం కాదు, ఇరాన్ సముద్ర వ్యూహంలో ఒక ప్రధాన అస్త్రం. అమెరికా సైనిక బడ్జెట్, సాంకేతికత ప్రపంచంలోనే అగ్రస్థానంలో ఉన్నప్పటికీ, ఈ మస్కిటో ఫ్లీట్ సవాలు దానికి ఊపిరి ఆడనీయడం లేదు. గల్ఫ్ ప్రాంతానికి మూడు భారీ విమాన వాహక నౌకలను పంపినప్పటికీ, హోర్ముజ్ జలసంధిలోకి వాటిని పంపడానికి అమెరికా వెనుకడుగు వేస్తోంది. ఇరుకైన జలసంధిలో ఈ భారీ నౌకలు సులభంగా మస్కిటో ఫ్లీట్ దాడికి చిక్కుకుపోయే ప్రమాదం ఉంది. వీటిని అడ్డుకోవడానికి అమెరికా అత్యంత ఖరీదైన డిఫెన్స్ క్షిపణులను వాడాల్సి వస్తోంది. ఇది వారి రక్షణ వ్యూహాల ఖర్చును ఊహించని రీతిలో పెంచేస్తోంది. అమెరికా వంటి అగ్రరాజ్యమే ఇప్పుడు ఆత్మరక్షణలో పడటం విశేషం. సరైన వ్యూహమే యుద్ధ రంగంలో గెలుపును నిర్ణయిస్తుందని ఇరాన్ నిరూపిస్తోంది. అంతిమంగా యుద్ధంలో గెలిచేది ఆయుధం కాదు, ఆ ఆయుధాన్ని వాడే వ్యూహం మాత్రమే. సముద్రపు అలల మధ్య సాగుతున్న ఈ పోరు ప్రపంచ గమనాన్ని మార్చవచ్చు. ఇరాన్ వేస్తున్న ప్రతి అడుగు అమెరికాను ఆత్మరక్షణలో పడేస్తోంది. ఇరాన్ మస్కిటో ఫ్లీట్ ఇప్పుడు ప్రపంచ రక్షణ నిపుణులకు కొత్త పాఠాలు నేర్పుతోంది. ఈ పరిణామాలు గల్ఫ్ ప్రాంతంలో ఎలాంటి ఉద్రిక్తతలకు దారితీస్తాయో వేచి చూడాలి.