దేశవ్యాప్తంగా 80వ స్వాతంత్య్ర దినోత్సవ వేడుకలు అంగరంగ వైభవంగా జరిగాయి. అయితే, ఎప్పుడూ తుపాకుల మోతతో, ఉద్రిక్తతలతో దద్దరిల్లే జమ్మూకశ్మీర్లో ఈసారి ఒక అద్భుతమైన, ఎవరూ ఊహించని దృశ్యం ఆవిష్కృతమైంది. ఒకప్పుడు జాతీయ జెండా ఎగురవేయాలంటే భయపడే కశ్మీర్ లోయలో.. ఏకంగా ఒక మోస్ట్ వాంటెడ్ లష్కర్-ఎ-తైబా ఉగ్రవాది తల్లిదండ్రులు తమ ఇంటిపై సగర్వంగా మువ్వన్నెల జెండాను ఎగురవేయడం అందరి దృష్టిని ఆకర్షించింది.
జమ్మూకశ్మీర్లోని షోపియాన్లో జరిగిన ఈ ఘటన ఇప్పుడు దేశవ్యాప్తంగా సంచలనంగా మారింది. కాశ్మీర్ లోని షోపియాన్ జిల్లా అనగానే మనకు గుర్తొచ్చేది ఉగ్రవాదుల స్థావరాలు, సైన్యం చేసే ఎన్కౌంటర్లు. కానీ భారత 80వ స్వాతంత్ర్య దినోత్సవం రోజున అక్కడ కనిపించిన సీన్ ప్రతి భారతీయుడి గుండె ఉప్పొంగేలా చేసింది. లష్కర్-ఎ-తైబా కమాండర్గా పనిచేస్తున్న అబిద్ రంజాన్ షేక్ అనే ఉగ్రవాది తల్లిదండ్రులు.. తమ ఇంటి పైకప్పుపై త్రివర్ణ పతాకాన్ని ఎగురవేశారు. అంతేకాదు, జాతీయ జెండాను చేతిలో పట్టుకుని, సగర్వంగా ఊపుతూ వారు స్వాతంత్ర్య వేడుకల్లో సంతోషంగా పాల్గొన్నారు. ఉగ్రవాద మార్గంలోకి వెళ్లిన తమ కొడుకు దారిని వారు పూర్తిగా వ్యతిరేకిస్తున్నారని, భారత దేశం పట్ల తమకు అపారమైన గౌరవం, అభిమానం ఉందనే విషయాన్ని వారు ఈ చర్య ద్వారా యావత్ ప్రపంచానికి చాటిచెప్పారు. పాకిస్థాన్ ప్రేరేపిత ఉగ్రవాదానికి ఇది ఒక అతిపెద్ద చెంపపెట్టు లాంటి పరిణామం. ఇంతకీ ఈ అబిద్ రంజాన్ షేక్ ఎవరు అంటే.. భారత భద్రతా సంస్థల మోస్ట్ వాంటెడ్ జాబితాలో ఉన్న ఒక డేంజరస్ ఉగ్రవాది. ప్రస్తుతం ఇతను పాకిస్థాన్ ఆక్రమిత కశ్మీర్ లో తలదాచుకుంటూ, అక్కడి నుంచే ఉగ్రవాద కార్యకలాపాలు నిర్వహిస్తున్నాడు. కశ్మీర్లో అమాయకుల ప్రాణాలు తీసిన పలు ఉగ్రవాద ఘటనలతో అతనికి ప్రత్యక్ష సంబంధాలు ఉన్నాయని దర్యాప్తు సంస్థలు గుర్తించాయి. ఒక దేశద్రోహి, రాక్షస ఉగ్రవాది ఇంట్లో.. ఏకంగా భారత జాతీయ జెండా రెపరెపలాడటం నిజంగా దేశభక్తులందరికీ ఆనందాన్ని ఇచ్చే అంశం.
నిజానికి కశ్మీర్లో ఇలాంటి ఆసక్తికరమైన, దేశభక్తిని చాటే దృశ్యం కనిపించడం ఇది మొదటిసారి కాదు. 2021లో జరిగిన ఒక అద్భుతమైన ఘటనను ఈ ఉదంతం మరోసారి గుర్తుచేసింది. 2016లో భద్రతా దళాల చేతిలో హతమైన హిజ్బుల్ ముజాహిదీన్ కమాండర్ బుర్హాన్ వానీ గురించి మీకు తెలిసే ఉంటుంది. బుర్హాన్ వానీ చనిపోయినప్పుడు కశ్మీర్లో అల్లర్లు సృష్టించడానికి పాకిస్థాన్ ఎంత ప్రయత్నించిందో చూశాం. కానీ అప్పట్లో బుర్హాన్ వానీ తండ్రి ముజఫర్ వానీ, ఒక ప్రభుత్వ పాఠశాలలో ఉపాధ్యాయుడిగా పనిచేస్తూ.. 2021 స్వాతంత్ర్య దినోత్సవం రోజున ఆ స్కూల్లో ఘనంగా జాతీయ జెండాను ఎగురవేశారు. తమ పిల్లలు దారితప్పి ఉగ్రవాదంలోకి వెళ్లినా, కశ్మీర్ ప్రజల హృదయాల్లో మాత్రం భారతదేశం పట్ల ప్రేమ ఉందని నిరూపించడానికి ఈ రెండు ఘటనలే సజీవ సాక్ష్యాలని కొనియాడుతున్నారు. ఇక జమ్మూ కాశ్మీర్ ముఖ్యమంత్రి ఒమర్ అబ్దుల్లా తన ప్రసంగంలో కీలక వ్యాఖ్యలు చేశారు. 2019లో రద్దైన జమ్మూకశ్మీర్ రాష్ట్ర హోదాను తిరిగి పునరుద్ధరించేందుకు తమ ప్రభుత్వం పూర్తిగా కట్టుబడి ఉందని ఆయన ప్రజలకు హామీ ఇచ్చారు. మరోవైపు, లెఫ్టినెంట్ గవర్నర్ మనోజ్ సిన్హా లోక్ భవన్లో త్రివర్ణ పతాకాన్ని ఆవిష్కరించారు.