నాలుగు దశాబ్దాలకు పైగా తెలుగు చిత్ర పరిశ్రమలో అలుపెరుగని కృషి, అంకితభావంతో అంచెలంచెలుగా ఎదిగిన మహోన్నత వ్యక్తి మెగాస్టార్ చిరంజీవి. సినిమా రంగంలో శిఖర స్థాయికి చేరుకోవడమే కాదు, కష్టాన్ని నమ్ముకుని, నిజాయితీగా శ్రమిస్తే ఏదైనా సాధించవచ్చని ఆయన నిరూపించారు. తరతరాలకు స్ఫూర్తిగా నిలిచిన వ్యక్తిత్వం ఆయనది. చిరంజీవి తన నటనా జీవితాన్ని 1978లో ‘పునాది రాళ్ళు’ చిత్రంతో ప్రారంభించారు.
22 సెప్టెంబర్ 1978 ఆరోజు మొదలైన నా సినీ ప్రయాణం నేటితో 48 వసంతాలు పూర్తి చేసుకుంది.ఈ 48 ఏళ్లలో ఎన్నో పాత్రలు పోషించాను. ఎన్నో విజయాలను చూశాను. ఎన్నో అవార్డులు, గౌరవాలు అందుకున్నాను అంటూ మెగాస్టార్ ఈ సందర్భంగా ఎమోషనల్ పోస్ట్ చేశారు. ఈ సుదీర్ఘ ప్రయాణంలో నన్ను నమ్మి అవకాశాలు ఇచ్చిన ప్రతి నిర్మాతకు, నాలోని నటుడిని కొత్త కొత్త కోణాల్లో ఆవిష్కరించిన ప్రతి దర్శకుడికి, నా ప్రతి సినిమా వెనుక అహర్నిశలు శ్రమించిన నటీనటులకు, సాంకేతిక నిపుణులకు, ప్రతి ఒక్కరికీ నా హృదయపూర్వక కృతజ్ఞతలు. మీ అందరి సహకారమే నన్ను ఈరోజు ఈ స్థాయిలో నిలబెట్టిందని పేర్కొన్నారు. అయితే ఆ విజయాలన్నింటికంటే గొప్పది… ప్రేక్షకులు, అభిమానులు తనపై చూపించిన ప్రేమ అని ఆ గౌరవాలన్నింటికంటే విలువైనది… వారి హృదయాల్లో తనకు ఇచ్చిన స్థానమే అని అన్నారు. నన్ను మీ కుటుంబ సభ్యుడిగా భావించి, ఇంతటి అపూర్వమైన ప్రేమాభిమానాలను అందించిన ప్రతి ఒక్క అభిమానికి నా హృదయపూర్వక ధన్యవాదాలు. ఆరోజు “చిరంజీవి” అనేది నేను పెట్టుకున్న పేరు. నేడు మీ ప్రేమతో అది నాకు దక్కిన శాశ్వతమైన గుర్తింపు అని తన పోస్ట్ లో పేర్కొన్నారు.
సినిమా కుటుంబ నేపథ్యం లేకుండా, స్వయంకృషితో ఎదిగిన చిరంజీవి ప్రయాణం ఎందరికో ఆదర్శం. ఆయన సినీ రంగ ప్రవేశానికి ముందు ఎన్నో కష్టాలను, అవమానాలను ఎదుర్కొన్నారు. కానీ ఆయన ఆత్మవిశ్వాసం, పట్టుదల ఏనాడూ తగ్గలేదు. చిన్న చిన్న పాత్రలతో తన ప్రస్థానాన్ని ప్రారంభించి, క్రమంగా తన నటనతో, డాన్స్తో ప్రేక్షకులను ఆకట్టుకున్నారు. సినీ పరిశ్రమలో నిలదొక్కుకోవడానికి ఆయన ఎదుర్కొన్న సవాళ్లు అసాధారణమైనవి. ఇన్నేళ్ల నటనా జీవితంలో చిరంజీవి ఎన్నో పురస్కారాలు అందుకున్నారు. పద్మ పురస్కారాల నుండి అనేక ఫిలిం అవార్డుల వరకు ఎన్నో ఆయన ఖాతాలో ఉన్నాయి. సినీ రంగంలోనే కాదు, నిజ జీవితంలోనూ ఆయన ఒక విజేతగా నిలిచారు. సేవా కార్యక్రమాలతో ఎందరో ఆపదలో ఉన్నవారికి ఆపద్బాంధవుడిగా నిలుస్తున్నారు. తెలుగు సినిమా ఉన్నంత వరకు చిరంజీవి చిరంజీవే. ఆయన అందుకున్న పురస్కారాలలో 10 ఫిలింఫేర్ అవార్డులు సౌత్, నాలుగు నంది అవార్డులు, ఒక రఘుపతి వెంకయ్య నాయుడు అవార్డు ఉన్నాయి. వీటిలో ఉత్తమ నటుడిగా పదిసార్లు ఫిలింఫేర్ అవార్డులను గెలుచుకున్నారు. చిరంజీవికి 2006లో భారత ప్రభుత్వం పద్మభూషణ్ పురస్కారంతో సత్కరించింది. భారతీయ సినిమాకు ఆయన చేసిన విశేష కృషికి గాను, 2024లో దేశంలో రెండవ అత్యున్నత పౌర పురస్కారమైన పద్మవిభూషణ్తో గౌరవించారు. ఇది కేవలం ఆయన నటనకు మాత్రమే కాదు, తెలుగు సినిమాను ప్రపంచ స్థాయిలో నిలబెట్టినందుకు లభించిన గుర్తింపు. అదే 2024లో, భారతీయ చిత్ర పరిశ్రమలో అత్యధిక చిత్రాలలో నర్తించిన నటుడిగా గిన్నిస్ వరల్డ్ రికార్డును కూడా ఆయన అందుకున్నారు. ఇది ఆయన కృషికి, అంకితభావానికి దక్కిన మరో గౌరవం.పద్మభూషణ్, పద్మవిభూషణ్ వంటి అత్యున్నత పౌర పురస్కారాలు చిరంజీవి కళాసేవకు దక్కిన అరుదైన గౌరవాలు. తెలుగు రాష్ట్రాల నుండి ఈ పురస్కారాలను అందుకున్న కొద్దిమంది ప్రముఖులలో ఆయన ఒకరు. ఆయన నాలుగు దశాబ్దాల సుదీర్ఘ సినీ ప్రస్థానానికి, ఆయన ప్రజాదరణకు నిదర్శనం. CNN-IBN 2013లో ఆయన్ను “భారతీయ సినిమా రూపురేఖలను మార్చిన వ్యక్తులలో” ఒకరిగా గుర్తించింది.చిరంజీవి సినీ ప్రస్థానంలో ఎన్నో విజయాలు, కొన్ని పరాజయాలు ఉన్నాయి. కానీ ఆయన ఏనాడూ వెనకడుగు వేయలేదు. ప్రతి పరాజయాన్ని ఒక పాఠంగా తీసుకుని, మరింత పట్టుదలతో ముందుకు సాగారు. ఆయన పనితీరు, ఆయన అంకితభావం, ఆయన వృత్తి పట్ల ఆయనకున్న గౌరవం నేటి తరం నటీనటులకు ఒక మార్గదర్శకం. చిరంజీవి ప్రభావాన్ని కేవలం తెలుగు రాష్ట్రాలకే పరిమితం చేయలేం. ఆయన చిత్రాలు భారతదేశ వ్యాప్తంగానే కాదు, ప్రపంచంలోని అనేక దేశాల్లో ఉన్న తెలుగు ప్రేక్షకులను అలరించాయి. ఆయనకు అంతర్జాతీయ స్థాయిలో అభిమానులు ఉన్నారు. ప్రస్తుతం చిరంజీవి తన సినిమా కెరీర్పైనే పూర్తి దృష్టి సారించారు. అభిమానులను అలరించడానికి కొత్త కొత్త కథలను ఎంచుకుంటున్నారు. ఇటీవలి కాలంలో ఆయన నటించిన చిత్రాలు మంచి విజయాన్ని సాధించాయి. చిరంజీవి కేవలం ఒక స్టార్డమ్ ఐకాన్ మాత్రమే కాదు, ఆయన ఒక తరం కలలను, ఆశలను నెరవేర్చిన వ్యక్తి. కత్తి మీద సాము లాంటి సినీ ప్రస్థానంలో ఎన్నో సవాళ్లను ఎదుర్కొని, తనకంటూ ఒక సామ్రాజ్యాన్ని సృష్టించుకున్నారు. ఆయన జీవితం, ఆయన ప్రయాణం ఎందరికో ఆదర్శం.