పిచ్‌ లలో మార్పు రావాల్సిందే: బౌలర్లకు సహకారం ఉండాల్సిందే..!

ప్రస్తుత క్రికెట్ ప్రపంచంలో మ్యాచ్‌లను చూస్తున్న అభిమానులను, క్రీడా విశ్లేషకులను తీవ్రంగా ఆలోచింపజేస్తున్న అంశం పిచ్‌ రూపకల్పన. ఇటీవల కాలంలో రూపొందిస్తున్న పిచ్‌లలో దాదాపు అధిక భాగం పూర్తిగా బ్యాటర్లకు అనుకూలంగా మారడమే ఇందుకు ప్రధాన కారణం. గతంలో బౌలర్లు, బ్యాటర్ల మధ్య జరిగే హోరాహోరీ పోరు క్రికెట్‌కు ప్రాణవాయువుగా నిలిచేది. కానీ నేడు ప్రతి మ్యాచ్‌లోనూ భారీ స్కోర్లు నమోదుకావడం, బౌలర్లకు ఎలాంటి సహకారం లభించకపోవడం ఆట సహజత్వాన్ని దెబ్బతీస్తోందనే అభిప్రాయాలు పెరిగిపోతున్నాయి.ఒకప్పుడు టీ20 లేదా వన్డే క్రికెట్‌ను పరిశీలిస్తే, మ్యాచ్‌లు క్లోజ్‌గా సాగుతూ ప్రతి పరుగుకు ఒక విలువుండేది. కానీ ప్రస్తుత తరం క్రికెట్‌లో సగటు స్కోర్ల అంచనాలు పూర్తిగా మారిపోయాయి. మొదట్లో టీ20ల్లో 160-170 పరుగులు గెలిచే స్కోరుగా భావించగా, ఇప్పుడు 200 పైచిలుకు పరుగులు కూడా రక్షణ లేకుండా పోతున్నాయి. పిచ్‌లు పూర్తిగా ప్లాట్‌గా ఉండడం వల్ల బౌలర్లు కేవలం పరుగులను సమర్పించుకునే యంత్రాలుగా మారిపోతున్నారనే అసంతృప్తి వ్యక్తమవుతోంది.

బ్యాటర్ల ఆధిపత్యం మాత్రమే నడిచే మ్యాచ్‌లలో సిక్సర్లు, ఫోర్లు చూడటానికి ఆకర్షణీయంగా అనిపించినా, సుదీర్ఘకాలంలో ఇది ఆటపై ఉన్న ఆసక్తిని తగ్గిస్తుందని పలువురు మాజీ క్రికెటర్లు ఆందోళన వ్యక్తం చేస్తున్నారు. బంతికి, బ్యాట్‌కు మధ్య సమతుల్యత ఉన్నప్పుడే ఆటకు అసలైన కిక్ లభిస్తుంది. స్వింగ్, సీమ్, లేదా టర్న్ ఉన్న పిచ్‌లపై బ్యాటర్లు తమ సాంకేతిక నైపుణ్యాన్ని ప్రదర్శించి పరుగులు సాధించినప్పుడే ఆ పరుగులకు గుర్తింపు దక్కుతుంది. కానీ ఎలాంటి సహకారం లేని పిచ్‌లపై కొట్టే పరుగులు నాణ్యమైన క్రీడా వినోదాన్ని అందించలేవు.

గతంలో మ్యాచ్‌లు జరిగిన తీరుతో పోలిస్తే, అప్పటి క్రికెట్‌లో నాణ్యత (Quality) చాలా స్పష్టంగా కనిపించేది. ప్రతిష్టాత్మక బౌలర్లు తమ స్పెల్స్‌తో మ్యాచ్ ఫలితాలను మార్చేసేవారు. పచ్చిక ఉన్న పిచ్‌లపై పేసర్లు, నాలుగో ఐదో రోజుల్లో తిరిగే పిచ్‌లపై స్పిన్నర్లు తమ మాయాజాలం ప్రదర్శించేవారు. అలాంటి కఠిన పరిస్థితులను అధిగమించి సెంచరీలు చేసిన బ్యాటర్లు నిజమైన ఛాంపియన్లుగా నిలిచేవారు. నేటి తరం పిచ్‌లలో ఆ విధమైన కఠిన సవాళ్లు లోపిస్తున్నాయనేది క్రీడా విశ్లేషకుల ప్రధాన విమర్శ.