ప్రపంచంలోనే అందరికంటే ముందుగా.. 2026కి స్వాగతం పలికిన కిరిటిమతి దీవి!

ప్రపంచవ్యాప్తంగా నూతన సంవత్సర వేడుకల కోలాహలం మొదలవ్వక ముందే, పసిఫిక్ మహాసముద్రంలోని కిరిబాటి దేశం చరిత్ర సృష్టించింది.అంతర్జాతీయ సమయ రేఖకు (IDL) అత్యంత సమీపంలో ఉండటంతో, ఈ దేశంలోని కిరిటిమతి (క్రిస్మస్ ఐలాండ్) దీవి ప్రపంచంలోనే మొట్టమొదటిగా నూతన సంవత్సరంలోకి అడుగుపెట్టింది.భారత కాలమానం ప్రకారం నేడు (డిసెంబర్ 31) మధ్యాహ్నం 3:30 గంటలకే అక్కడ అర్ధరాత్రి కావడంతో, స్థానికులు మిన్నంటే బాణాసంచా వేడుకలతో కొత్త ఏడాదికి ఘనస్వాగతం పలికారు.కిరిటిమతి తర్వాత కొద్ది నిమిషాల వ్యవధిలోనే న్యూజిలాండ్‌లోని చాథమ్ దీవులు, ఆ తర్వాత టోంగా, సమోవా దీవులు 2026లోకి ప్రవేశించాయి.భౌగోళికంగా ఈ దీవులు భూమధ్యరేఖకు సమీపంలో ఉండటం, సమయ మండలాల (UTC+14) వ్యత్యాసం కారణంగా ప్రపంచం కంటే దాదాపు ఒక రోజు ముందుగానే ఇక్కడ వేడుకలు జరగడం విశేషం.

అయితే ప్రకృతి వైవిధ్యానికి నెలవైన కిరిబాటి కేవలం వేడుకలకే కాదు, గ్లోబల్ వార్మింగ్ హెచ్చరికలకు కూడా కేంద్రబిందువుగా మారింది. సముద్ర మట్టాలు పెరుగుతుండటంతో ఈ దీవులు ముంపు ప్రమాదాన్ని ఎదుర్కొంటున్నప్పటికీ, ప్రజలు మాత్రం తమ సంప్రదాయ నృత్యాలు, వేడుకలతో ఉత్సాహంగా గడుపుతున్నారు. కిరిటిమతి తర్వాత వరుసగా న్యూజిలాండ్, ఆస్ట్రేలియా, జపాన్ వంటి దేశాలు కొత్త ఏడాదికి స్వాగతం పలకనున్నాయి. భారత్‌లో నేడు అర్ధరాత్రి వేడుకలు మొదలయ్యే సమయానికి, కిరిబాటిలో అప్పుడే 2026 మొదటి రోజూ సూర్యోదయం అవ్వడం గమనార్హం.