ధ్రువ్ జురెల్ శ్రీలంకతో జరిగిన రెండో టెస్టులో అద్భుత సెంచరీతో అదరగొట్టిన సంగతి తెలిసిందే. ఆ తరువాత అతని సెలబ్రేషన్ సోషల్ మీడియాలో అందరి దృష్టిని ఆకర్షిస్తోంది. తన చేతి మజిల్ పై ఉన్న ‘జై జవాన్ జై కిసాన్’ అని ఉన్న టాటూ చూపిస్తూ చేసిన అతని సెలబ్రేషన్ పై ప్రశంసలు కురుస్తున్నాయి. ఇక రెండో టెస్టు మొదటి ఇన్నింగ్స్ లో జురెల్ అతను అజేయంగా 115 పరుగులు చేసి, తన టెస్టు కెరీర్లో రెండో సెంచరీని నమోదు చేశాడు. జురెల్ ఈ సెలబ్రేషన్ వెనుక ఉన్న కారణాన్ని వివరించాడు. తన తాత ఒక రైతు అని, తండ్రి నేమ్ సింగ్ జురెల్ భారత సైన్యంలో జవాన్గా పనిచేసి, కార్గిల్ యుద్ధంలో పాల్గొన్న వీరుడని జురెల్ వెల్లడించాడు. “జై జవాన్, జై కిసాన్” అనే నినాదం దేశానికి సేవ చేసే సైనికులను, దేశానికి అన్నం పెట్టే రైతులకు గౌరవం ఇస్తుంది. జురెల్ తన తండ్రి, తాత అందించిన స్ఫూర్తిని ఈ విధంగా ప్రపంచానికి చూపాడు.
జురెల్ సెంచరీతో భారత్ తమ తొలి ఇన్నింగ్స్ను 503 పరుగుల వద్ద 9 వికెట్ల నష్టానికి డిక్లేర్ చేసింది. రెండో రోజు ఆట ముగిసే సమయానికి శ్రీలంక 8 పరుగులకు 2 వికెట్లు కోల్పోయి, భారత్ కంటే 495 పరుగుల వెనుకంజలో ఉంది. ఇక, జురెల్ సాధించిన ఈ సెంచరీ అతన్ని ఒక ప్రత్యేకమైన రికార్డులోకి చేర్చింది. శ్రీలంకలో నం. 7 లేదా అంతకంటే తక్కువ స్థానంలో టెస్టు సెంచరీ సాధించిన రెండో భారత బ్యాట్స్మెన్గా జురెల్ నిలిచాడు. గతంలో హార్దిక్ పాండ్యా మాత్రమే ఈ ఘనతను సాధించాడు. జురెల్ ఆడిన ఈ ఇన్నింగ్స్ జట్టుకు ఎంతో అవసరమైన సమయంలో వచ్చింది, అది కూడా చాలా ఒత్తిడిలో. ముఖ్యంగా, రిషబ్ పంత్ గాయంతో రిటైర్డ్ హర్ట్ అయిన తర్వాత క్రీజులోకి వచ్చిన జురెల్, పంత్తో కలిసి ఏడో వికెట్కు 112 పరుగుల కీలక భాగస్వామ్యాన్ని నెలకొల్పాడు. ఆ తర్వాత మానవ్ సుతార్తో 39 పరుగులు, సిరాజ్తో 31 పరుగుల భాగస్వామ్యాలతో జట్టును పటిష్ట స్థితికి చేర్చాడు. ‘జై జవాన్, జై కిసాన్’ అనే నినాదాన్ని 1965లో భారతదేశ రెండవ ప్రధానమంత్రి లాల్ బహదూర్ శాస్త్రి దేశానికి అందించారు. ఆ సమయంలో భారతదేశం పాకిస్తాన్తో యుద్ధాన్ని ఎదుర్కొంటున్నది, అదే సమయంలో తీవ్రమైన ఆహార ధాన్యాల కొరత కూడా ఉండేది. సైనికులను దేశ రక్షణకు ప్రోత్సహించడానికి, రైతులకు ఆహార ఉత్పత్తిని పెంచడానికి ఈ నినాదం ఎంతగానో స్ఫూర్తినిచ్చింది, దేశవ్యాప్తంగా అపారమైన ప్రజాదరణ పొందింది. ధ్రువ్ జురెల్ సెలబ్రేషన్పై సోషల్ మీడియాలో భారీ ప్రశంసలు కురుస్తున్నాయి. యువతకు జురెల్ ఒక రోల్ మోడల్గా నిలుస్తున్నాడని అనేక మంది అభిప్రాయపడుతున్నారు. దేశభక్తిని, కుటుంబ విలువలను ఒకేసారి చాటి చెప్పిన జురెల్ తీరు అందరినీ ఆకట్టుకుంది. ఈ విజయం జురెల్ కెరీర్కు మరింత ఊపునిస్తుంది. రాబోయే రోజుల్లో అతను భారత క్రికెట్లో ఒక కీలక ఆటగాడిగా మారే అవకాశం ఉంది. మరి, ఇలాంటి స్ఫూర్తిదాయక ఆటగాళ్లను మనం ప్రోత్సహించాలి.