సాధారణంగా తెలుగు రాష్ట్రాల్లో సంక్రాంతి పండుగకు ఉండే సినిమా క్రేజ్ గురించి ప్రత్యేకంగా చెప్పనక్కర్లేదు. ఇప్పటికే ప్రభాస్ ‘రాజా సాబ్’ విడుదలై సందడి చేస్తుండగా, మెగాస్టార్ చిరంజీవి శంకర వర ప్రసాద్, రవితేజ ‘భర్త మహాశయులకు విజ్ఞప్తి’, నవీన్ పోలిశెట్టి ‘అనగనగ ఒక రాజు’, మరియు శర్వానంద్ ‘నారి ఆరి నడుమ మురారి’ వంటి చిత్రాలు క్యూలో ఉన్నాయి. అయితే మన పొరుగు రాష్ట్రమైన తమిళనాడులో పరిస్థితి ఇందుకు భిన్నంగా ఉంది. తమిళ ప్రజలకు అత్యంత ఇష్టమైన పొంగల్ సీజన్లో ఈసారి ప్రేక్షకులను అలరించే భారీ తమిళ సినిమాలు ఒక్కటి కూడా లేకపోవడం తమిళ చిత్రపరిశ్రమలో తీవ్ర చర్చనీయాంశంగా మారింది.
ముఖ్యంగా కార్తీ నటించిన ‘వా వాత్తియార్’ సినిమాకు ఊహించని చిక్కులు ఎదురయ్యాయి. ఈ చిత్ర నిర్మాత ఫైనాన్సియర్కు చెల్లించాల్సిన రూ. 21 కోట్ల బకాయిల నేపథ్యంలో మద్రాస్ హైకోర్టు సంచలన తీర్పునిచ్చింది. ఈ మొత్తాన్ని రికవరీ చేసేందుకు సినిమా హక్కులను బహిరంగ వేలానికి (Public Auction) వేయాలని ఆదేశించింది. అంతవరకు థియేటర్లు, ఓటీటీ, డిజిటల్ ప్లాట్ఫామ్లు ఇలా ఏ మాధ్యమంలోనూ సినిమాను విడుదల చేయకూడదని శాశ్వత స్టే విధించడంతో, కార్తీ అభిమానులు తీవ్ర నిరాశకు గురయ్యారు.
మరోవైపు ‘పరాశక్తి’ సినిమా కూడా విడుదల సమయంలో ఇబ్బందులను ఎదుర్కొంటోంది. ఈ చిత్రానికి విడుదలకు కేవలం ఒక్క రోజు ముందు మాత్రమే సెన్సార్ సర్టిఫికెట్ లభించింది. దీంతో ప్రస్తుతానికి ఈ సినిమాను కేవలం తమిళంలో మాత్రమే విడుదల చేస్తున్నారు. ఒకవేళ అక్కడ సినిమాకు మిశ్రమ స్పందన వస్తే, తెలుగులో విడుదల చేసినప్పుడు ఓపెనింగ్స్ రాకపోవచ్చని ట్రేడ్ వర్గాలు ఆందోళన చెందుతున్నాయి. ఈ సినిమా బాక్సాఫీస్ వద్ద నిలబడాలంటే అక్కడ కచ్చితంగా పాజిటివ్ టాక్ రావాల్సిన పరిస్థితి నెలకొంది.
ఇక ‘జన నాయగన్’ సినిమా విషయంలో కూడా న్యాయపరమైన అడ్డంకులు కొనసాగుతున్నాయి. ఈ సినిమాకు యూ/ఏ సర్టిఫికెట్ ఇవ్వాలన్న సింగిల్ జడ్జ్ ఉత్తర్వులపై మద్రాస్ హైకోర్టు డివిజన్ బెంచ్ తాత్కాలిక స్టే విధించింది. దీనిపై తదుపరి విచారణ జనవరి 21న జరగనుంది. అంటే పొంగల్ సెలవులన్నీ పూర్తయ్యాక కానీ ఈ సినిమా భవిష్యత్తు తేలదు. ఇలా పెద్ద స్టార్ల సినిమాలు వరుసగా ఫైనాన్సింగ్ సమస్యలు మరియు కోర్టు కేసుల్లో చిక్కుకోవడంతో, తమిళ సినీ పరిశ్రమ ఈసారి పండుగ సీజన్లో కళ తప్పిందని చెప్పవచ్చు.