సినిమా ప్రపంచంలో సంక్రాంతి సీజన్కు ఉండే ప్రాధాన్యం గురించి ప్రత్యేకంగా చెప్పాల్సిన అవసరం లేదు. తెలుగు రాష్ట్రాల్లో ఈ పండుగ కేవలం పండగ మాత్రమే కాకుండా, భారీ సినిమాల విడుదలకు అత్యంత అనుకూలమైన సమయంగా ఉంటుంది. అందుకే చాల మంది నిర్మాతలు, దర్శకులు తమ ప్రతిష్టాత్మక సినిమాలను ప్రత్యేకంగా సంక్రాంతిని లక్ష్యంగా చేసుకుని రూపొందిస్తుంటారు. ఈ నేపథ్యంలో అన్నపూర్ణ స్టూడియోస్ తాజాగా చేసిన ఒక ఆసక్తికర ప్రకటన సినీ అభిమానుల్లో కొత్త ఉత్సాహాన్ని నింపింది. 2027 సంక్రాంతికి తమ నిర్మాణ సంస్థ నుంచి ఒక ప్రత్యేక చిత్రం విడుదల కాబోతుందని ప్రకటించినా, హీరో ఎవరు? సినిమా పేరు ఏమిటి? కథ ఏంటి? వంటి కీలక వివరాలను మాత్రం గోప్యంగా ఉంచింది. కేవలం రిలీజ్ డేట్ను గుర్తుంచుకోండంటూ ముందుగానే ప్రమోషన్ ప్రారంభించడం ఆసక్తిని మరింత పెంచింది.
ముఖ్యంగా “వాసివాడి తస్సాదియ్యా… 2027 సంక్రాంతికి సోగ్గాళ్లు వస్తే పండగ ఇంకా రంగులమయం అవుతుంది కదా” అనే ట్యాగ్లైన్తో జనవరి 15 విడుదల తేదీని ప్రకటించడం అభిమానుల్లో ఊహాగానాలకు తెరలేపింది. ఈ ప్రకటనతో వెంటనే అందరి దృష్టి నాగార్జున వైపు మళ్లింది. ఎందుకంటే గతంలో వచ్చిన ‘సోగ్గాడే చిన్నినాయనా’, ఆ తరువాత వచ్చిన ‘బంగార్రాజు’ చిత్రాలు ప్రేక్షకులను బాగా అలరించి మంచి విజయాలను సాధించాయి. ముఖ్యంగా గ్రామీణ వాతావరణం, కుటుంబ భావోద్వేగాలు, సరదా వినోదం కలగలిపిన ఆ కథలు ప్రేక్షకులకు దగ్గరయ్యాయి. ఇప్పుడు అదే దర్శకుడు కల్యాణ్ కృష్ణ మళ్లీ నాగార్జునతో మరో సినిమా చేయబోతున్నారనే ప్రచారం చాలాకాలంగా వినిపిస్తోంది. తండ్రి-కొడుకుల మధ్య ఉన్న భావోద్వేగ బంధాన్ని వినోదాత్మకంగా చూపించిన ఆ చిత్రం కుటుంబ ప్రేక్షకులను బాగా ఆకట్టుకుంది. ఇప్పుడు అదే జంటతో మరో కొనసాగింపు కథ రూపొందుతుందా? లేక పూర్తిగా కొత్త కథలో కానీ, అదే గ్రామీణ నేపథ్యంతో కొత్త పాత్రలతో కానీ సినిమా తెరకెక్కుతుందా? అనే సందేహాలు అభిమానుల్లో చర్చకు దారితీస్తున్నాయి. అయితే ఈ సినిమా నిజంగా ‘సోగ్గాడే చిన్నినాయనా’ సినిమాకి కొనసాగింపా? లేక పూర్తిగా కొత్త కథనా? నాగార్జునతో పాటు నాగచైతన్య, అఖిల్ కూడా భాగమవుతారా? అనే ప్రశ్నలకు సమాధానం రావాలంటే అధికారిక ప్రకటన వచ్చే వరకు వేచి చూడాల్సిందే.