ఒకవైపు ఇరాన్..మరోవైపు హౌతీలు..భారత్‌కు పొంచి ఉన్న అతి పెద్ద గండం!
ఒకవైపు ఇజ్రాయెల్‌పై ఇరాన్ ప్రతీకార దాడులు, మరోవైపు ఎర్ర సముద్రంలో వాణిజ్య నౌకలపై హౌతీల విధ్వంసం..వెరసి ప్రపంచ దేశాల గుండెల్లో రైళ్లు పరిగెడుతున్నాయి. మిడిల్ ఈస్ట్‌లో ఇప్పుడు నెలకున్న యుద్ధ వాతావరణం కేవలం ఆయా దేశాలకే పరిమితం కాలేదు. ఇది నేరుగా భారతదేశ ఆర్థిక వ్యవస్థను, సామాన్యుడి జీవనాన్ని టార్గెట్ చేస్తోంది. భారతదేశానికి ,క్రూడ్ ఆయిల్‌కు ఉన్న సంబంధం ప్రాణవాయువు లాంటిది. మన దేశానికి కావాల్సిన మొత్తం చమురులో దాదాపు 85 శాతం మనం ఇతర దేశాల నుంచే దిగుమతి చేసుకుంటున్నాం. ఇప్పుడు ఇరాన్, సౌదీ అరేబియా, ఇజ్రాయెల్ మధ్య ఘర్షణలు పెరిగితే.. మిడిల్ ఈస్ట్ నుంచి వచ్చే ఆయిల్ సప్లై ఆగిపోతుంది. సప్లై తగ్గగానే ఆటోమేటిక్‌గా ఇంటర్నేషనల్ మార్కెట్లో క్రూడ్ ఆయిల్ ధరలు భగ్గుమంటాయి. ఆయిల్ రేటు పెరిగితే ఏమవుతుంది? మనం దిగుమతి చేసుకునే చమురుకు ఎక్కువ డాలర్లు చెల్లించాల్సి వస్తుంది. మన దగ్గర ఉన్న డాలర్ల రిజర్వులు కరిగిపోతాయి. డాలర్‌కు డిమాండ్ పెరిగి, మన రూపాయి విలువ అమాంతం పడిపోతుంది. డాలర్‌తో పోలిస్తే రూపాయి ఎంత పతనమైతే, మన దేశంలో పెట్రోల్, డీజిల్, గ్యాస్ ధరలు అంతలా పెరుగుతాయి. ట్రాన్స్‌పోర్టేషన్ ఖర్చులు పెరగడం వల్ల కూరగాయల నుంచి ఎలక్ట్రానిక్స్ వరకు ప్రతి వస్తువు రేటు పెరుగుతుంది. అంటే, ఆయిల్ షాక్ అనేది కేవలం పెట్రోల్ బంక్‌లకే పరిమితం కాదు, ప్రతి ఇంట్లోని వంటింటికి సెగ తాకుతుంది. ప్రస్తుతం రూపాయి కాస్త నిలదొక్కుకుంటున్నట్లు కనిపిస్తున్నా, మిడిల్ ఈస్ట్‌లో ఒక్క పెద్ద దాడి జరిగినా మళ్లీ ఆయిల్ షాక్ ఖాయం.
ఇరాన్, ఇజ్రాయెల్ మధ్య ప్రత్యక్ష యుద్ధం వస్తే.. ప్రపంచంలోనే అత్యంత కీలకమైన స్ట్రెయిట్ ఆఫ్ హార్ముజ్ జలసంధిని ఇరాన్ బ్లాక్ చేసే ప్రమాదం ఉంది. ప్రపంచ చమురు సరఫరాలో 20 శాతానికి పైగా ఈ చిన్న మార్గం గుండానే జరుగుతుంది. ఒకవేళ ఇరాన్ దీన్ని మూసివేస్తే ప్రపంచవ్యాప్తంగా చమురు హాహాకారాలు మొదలవుతాయి. ఇండియాకు వచ్చే చమురు కూడా అక్కడినుంచే రావాలి. రెండవది హౌతీలు. యెమెన్‌లోని హౌతీ తిరుగుబాటుదారులు ఎర్ర సముద్రంలో చేస్తున్న విధ్వంసం అంతా ఇంతా కాదు. ఆసియా, యూరప్ మధ్య జరిగే వ్యాపారానికి ఎర్ర సముద్రమే ప్రధాన మార్గం. ఇండియా తన ఎగుమతులను యూరప్‌కు పంపాలంటే ఈ మార్గమే బెస్ట్. కానీ హౌతీలు కార్గో నౌకలపై మిస్సైల్స్‌తో దాడులు చేస్తుండటంతో.. వాణిజ్య నౌకలన్నీ ఈ దారిని వదిలేసి, ఆఫ్రికా ఖండాన్ని చుట్టుకుని వెళ్తున్నాయి. దీని వల్ల ఇండియా నుంచి యూరప్‌కు వెళ్లే సరుకులకు 15 నుంచి 20 రోజులు అదనపు సమయం పడుతోంది. ట్రాన్స్‌పోర్ట్ చార్జీలు, ఇన్సూరెన్స్ రేట్లు ఏకంగా 300 శాతం పెరిగాయి. దీనివల్ల మన ఎగుమతిదారులు తీవ్రంగా నష్టపోతున్నారు. ఈ రెండు పరిణామాలు చూస్తుంటే, ఇండియా భవిష్యత్తు వాణిజ్యానికి ఇది కచ్చితంగా పెద్ద గండమే అని ఆర్థిక నిపుణులు హెచ్చరిస్తున్నారు.
