అనుష్క ఈజ్ బ్యాక్..?ఫ్యాన్స్ వెయిటింగ్
సినిమాలు చేసినా చేయకపోయినా ప్రేక్షకుల్లో ఆమెకున్న క్రేజ్ ఏమాత్రం తగ్గలేదు. గ్లామర్ పాత్రలైనా, యాక్టింగ్ లో లేడీ ఓరియెంటెడ్ పాత్రలకైనా కేరాఫ్ అడ్రస్ అనుష్క. అయితే గత కొంతకాలంగా ఆన్ స్క్రీన్ మీద స్వీటీ సినిమాలు లేవు, ఆఫ్ స్క్రీన్ లో కనీసం బయట ఫంక్షన్లకు రావడం లేదు.. పోనీ సోషల్ మీడియాలో ఏమైనా యాక్టివ్ గా ఉందా అంటే అదీ లేదు. అనుష్క లాస్ట్ మూవీ ఘాటీ తర్వాత మరో కొత్త సినిమా అనౌన్స్ మెంట్ రాలేదు. మూడేళ్ల క్రితం ఒప్పుకున్న మలయాళ పాన్ వరల్డ్ మూవీ కథనార్ ట్రైలర్ వచ్చి 7 నెలలు అవుతున్నా..రిలీజ్ ఊసే లేదు. పైగా మొన్న నవంబర్ 7న అనుష్క పుట్టినరోజు జరిగితే, కనీసం ఆ సినిమా టీమ్ నుంచి ఒక చిన్న పోస్టర్ కూడా రాకపోవడం ఇప్పుడు ఫ్యాన్స్ కు తీవ్ర ఆగ్రహం తెప్పిస్తోంది. అసలు స్వీటీ ఈ రేంజ్ లో సైలెంట్ అవ్వడానికి కారణం ఏంటి అనే ప్రశ్నలు అభిమానుల నుండి వస్తున్నాయి.
కథనార్ సినిమాను మలయాళ స్టార్ హీరో జయసూర్య ప్రధాన పాత్రలో, అత్యంత భారీ బడ్జెట్‌తో వర్చువల్ ప్రొడక్షన్ టెక్నాలజీని ఉపయోగించి తెరకెక్కిస్తున్నారు. మూడేళ్ల క్రితం అనుష్క ఈ సినిమాను అంగీకరించింది. శ్రీ గోకులం మూవీస్ నిర్మిస్తున్న ఈ చిత్రంలో అనుష్క నీల అనే ఒక అత్యంత కీలకమైన, పవర్ ఫుల్ పాత్రలో కనిపించనుంది. ఇదొక పాన్ వరల్డ్ ప్రాజెక్ట్. ఇండియన్ భాషలే కాకుండా ప్రపంచవ్యాప్తంగా ఏకంగా 15 భాషల్లో ఈ చిత్రాన్ని విడుదల చేయాలని నిర్మాతలు ప్లాన్ చేస్తున్నారు. ఏడు నెలల క్రితం ఈ సినిమాకు సంబంధించిన ఒక గ్లింప్స్ ట్రైలర్ రిలీజ్ చేస్తే రెస్పాన్స్ అద్భుతంగా వచ్చింది. కానీ ఆ తర్వాతే అసలు సమస్య మొదలైంది. సినిమా ఎప్పుడు ప్రేక్షకుల ముందుకు వస్తుందనే విషయంపై చిత్రబృందం ఇంతవరకు ఎలాంటి స్పష్టత ఇవ్వలేదు. భారీ స్థాయిలో రూపొందుతున్న ఈ సినిమా కోసం అనుష్క ఫాన్స్ వేయికళ్లతో ఎదురుచూస్తున్నారు. కనీసం నవంబర్ 7న అనుష్క పుట్టినరోజు సందర్భంగా అయినా కథనార్ నుంచి ఒక స్పెషల్ పోస్టర్ లేదా క్యారెక్టర్ గ్లింప్స్ వస్తుందని అభిమానులు ఎంతో ఆశించారు. కానీ ఫ్యాన్స్‌కు నిరాశే మిగిలింది. అసలు ఈ ప్రాజెక్ట్ నడుస్తోందా? లేక ఆగిపోయిందా అన్న అనుమానాలు ఫ్యాన్స్ లో మొదలయ్యాయి.
సాధారణంగా ఒక స్టార్ హీరోయిన్ సినిమా రిలీజ్ లేట్ అయితే, వేరే ప్రాజెక్టులను అనౌన్స్ చేస్తారు. లేదా బ్రాండ్ ఎండార్స్‌మెంట్స్ , కమర్షియల్ యాడ్స్ చేస్తూ టీవీల్లో కనిపిస్తారు. కానీ అనుష్క శెట్టి అలా కాదు. ఆమె సినిమాను ఒప్పుకుంటే దానికే వంద శాతం న్యాయం చేస్తుంది. గతంలో నిశ్శబ్దం,మిస్ శెట్టి మిస్టర్ పోలిశెట్టి, ఘాటీ సినిమాల ప్రమోషన్స్ టైంలో కూడా అనుష్క చాలా తక్కువగా బయటకు వచ్చింది. కానీ అప్పుడైనా సోషల్ మీడియాలో పోస్టులు పెట్టింది. ఇప్పుడు ఆ ఊసు కూడా లేదు. ఇదంతా చూస్తుంటే అనుష్క ఏదో ఒక భారీ సర్ప్రైజ్ ప్లాన్ చేస్తోందని, అందుకే పబ్లిక్ అప్పీరెన్స్ ఇవ్వడం లేదని ట్రేడ్ వర్గాల్లో ఒక బలమైన వాదన వినిపిస్తోంది. ఆ సర్ప్రైజ్ మరేదో కాదు.. ఇండియన్ సినిమా రికార్డులను తిరగరాసిన బాహుబలి ఫ్రాంచైజీకి సంబంధించిన మూడో భాగం. అనుష్క కెరీర్‌లో మకుటాయమానంగా నిలిచిన పాత్ర దేవసేన. ఆ క్యారెక్టర్ ఇంపాక్ట్ ఎలాంటిదంటే, బాహుబలి 2 తర్వాత ఏ సినిమా చూసినా అందులో ఆ దేవసేన రేంజ్ వెతుక్కునేలా చేసింది. ఇటీవల నిర్మాత కె.ఇ. జ్ఞానవేల్ రాజా ఒక ప్రెస్ మీట్ లో మాట్లాడుతూ బాహుబలి 3 పక్కాగా ఉంటుందని, రాజమౌళి మైండ్ లో దానికి సంబంధించిన ప్లానింగ్ ఉందని ఒక సెన్సేషనల్ హింట్ ఇచ్చారు.దీంతో అనుష్క కెరీర్‌లో తదుపరి భారీ ప్రాజెక్ట్‌గా బాహుబలి 3 ఉండొచ్చనే ప్రచారం సోషల్ మీడియాలో వైరల్ గా మారింది. ప్రభాస్, అనుష్కల కాంబినేషన్ కు ఉన్న క్రేజ్ గురించి ప్రత్యేకంగా చెప్పాల్సిన పనిలేదు. బాహుబలి 3లో ఈ పెయిర్ మళ్లీ రిపీట్ అయితే ఇంటర్నెట్ బద్దలవ్వడం ఖాయం. ఒకవేళ రాజమౌళి నిజంగానే ఆ ప్రాజెక్ట్ కోసం అనుష్కను లాక్ చేసి ఉంటే.. కచ్చితంగా ఆమెను బయట ఎక్కడా కనిపించవద్దని, ఆ సీక్రెట్ మెయింటైన్ చేయాలని కండిషన్ పెట్టి ఉంటారని నెటిజన్లు థియరీలు అల్లేస్తున్నారు. అయితే ఈ సినిమాపై ఇప్పటివరకు అటు రాజమౌళి నుంచి కానీ, ఇటు ఆర్కా మీడియా నుంచి కానీ ఎలాంటి అధికారిక స్పష్టత లేదు. ఒక హీరోయిన్ కేవలం అందంతోనే కాదు, తన అభినయంతో కోట్లాది మంది అభిమానుల గుండెల్లో చెరగని ముద్ర వేయగలదు అని నిరూపించిన ఏకైక నటి అనుష్క. అందుకే ఆమె ఎన్ని రోజులు గ్యాప్ తీసుకున్నా, ఫ్యాన్స్ ఆమెను మర్చిపోవడం లేదు. అనుష్క కొత్త సినిమా ఎప్పుడు ప్రకటిస్తుందో, అసలు ఆ కథనార్ ఎప్పుడు విడుదలవుతుందో తెలియని సందిగ్ధ పరిస్థితి నెలకొంది. సినిమాలకు, సోషల్ మీడియాకు ఇలా పూర్తిగా దూరంగా ఉంటున్న స్వీటీ.. త్వరలోనైనా తన సైలెన్స్ బ్రేక్ చేసి అభిమానులకు ఏదైనా స్వీట్ న్యూస్ చెబుతుందేమో అని ఫ్యాన్స్ ఆశిస్తున్నారు.
