అమెరికాలో కర్ణాటక అల్లుడి పవర్..ట్రంప్ కే షాకిచ్చిన తొలి ముస్లిం సెనేటర్!
యూఎస్ సెనేట్ కు మొట్టమొదటిసారిగా ఒక ముస్లిం సభ్యుడు ఎన్నికై రికార్డు సృష్టించాడు. ఆయనే డాక్టర్ అబ్దుల్ ఎల్-సయ్యద్ . ఈ విజయం వెనుక మన ఇండియాకు, అందులోనూ మన సౌత్ ఇండియాకు ఉన్న కనెక్షన్ ఇప్పుడు నెట్టింట హాట్ టాపిక్ గా మారింది. అమెరికా సెనేట్ లో అడుగుపెడుతున్న ఈ తొలి ముస్లిం సభ్యుడు.. కర్ణాటక అల్లుడు కావడం విశేషం. ఏకంగా అమెరికా మాజీ అధ్యక్షుడు డొనాల్డ్ ట్రంప్ రంగంలోకి దిగి, ఎల్-సయ్యద్ పై తీవ్రమైన వ్యక్తిగత విమర్శలు చేసినప్పటికీ, ట్రంప్ అభ్యర్థిని ఓడించి మరీ ఈ భట్కల్ అల్లుడు సంచలన విజయం సాధించాడు. డాక్టర్ అబ్దుల్ ఎల్-సయ్యద్ కు ఇప్పుడు 42 ఏళ్లు. అమెరికాలోని మిచిగాన్ రాష్ట్రం నుంచి డెమోక్రటిక్ పార్టీ తరఫున ఆయన సెనేట్ స్థానానికి పోటీ చేశారు. తన ప్రధాన ప్రత్యర్థి అయిన రిపబ్లికన్ అభ్యర్థి మైక్ రోజర్స్‌ పై ఘనవిజయం సాధించారు. ఎల్-సయ్యద్ సాధించిన ఈ చారిత్రాత్మక విజయంతో అటు అమెరికాలో ఎంత సంబరాలు జరుగుతున్నాయో.. ఇటు కర్ణాటకలోని తీర ప్రాంత పట్టణమైన భట్కల్ , రాజధాని బెంగళూరులో కూడా అంతే స్థాయిలో పండుగ వాతావరణం నెలకొంది.
సారా కుటుంబ మూలాలు కర్ణాటకలోని భట్కల్‌లోనే ఉన్నాయి. ఆవిడ కుటుంబానికి కూడా ఒక గొప్ప రాజకీయ చరిత్ర ఉంది. సారా తాతయ్య జుకాకు షంషుద్దీన్, పూర్వపు మైసూర్ రాష్ట్రంలో బీడీ జత్తి ముఖ్యమంత్రిగా ఉన్న కాలంలో ఆర్థిక శాఖ డిప్యూటీ మంత్రిగా సేవలందించారు. సారా బెంగళూరులో ఎంబీబీఎస్ పూర్తి చేసి, ఉన్నత విద్య కోసం అమెరికా వెళ్లారు. మిచిగాన్ యూనివర్సిటీలో చదువుకుంటున్న సమయంలోనే, అక్కడే ఉన్న రోడ్స్ స్కాలర్ అయిన ఎల్-సయ్యద్‌తో ఆమెకు పరిచయం ఏర్పడి, ఆ తర్వాత వివాహం చేసుకున్నారు. అలా డాక్టర్ సయ్యద్ మన కర్ణాటకకు అల్లుడయ్యాడు. ఒక ముస్లిం అభ్యర్థి అమెరికా సెనేట్ కు పోటీ చేస్తున్నాడు అనగానే రిపబ్లికన్ పార్టీకి భయం పట్టుకుంది. అందులోనూ ఈ మిచిగాన్ సెనేట్ ఎన్నికల ప్రచారంలో ఇజ్రాయెల్-గాజా యుద్ధం ప్రధాన అంశంగా మారిపోయింది. గాజాలో ఇజ్రాయెల్ జరుపుతున్న సైనిక దాడులను, అందుకు అమెరికా ప్రభుత్వం నిరభ్యంతరంగా అందిస్తున్న సైనిక సహాయాన్ని అబ్దుల్ ఎల్-సయ్యద్ తీవ్రంగా వ్యతిరేకించారు. గాజాలో జరుగుతున్నది కచ్చితంగా మానవహక్కుల ఉల్లంఘనే అని ఆయన ఓపెన్ గా గళమెత్తారు. దీనిపై రిపబ్లికన్ నాయకుడు, అమెరికా అధ్యక్షుడు డొనాల్డ్ ట్రంప్ నేరుగా రంగంలోకి దిగారు. అబ్దుల్ ఎల్-సయ్యద్‌పై వ్యక్తిగతంగా తీవ్ర విమర్శలు గుప్పించారు. ఎల్-సయ్యద్‌కు ఇజ్రాయెల్ అన్నా, యూదులన్నా విపరీతమైన ద్వేషం అని ట్రంప్ ఆరోపించారు. కానీ ఎల్-సయ్యద్ ఎక్కడా వెనక్కి తగ్గలేదు. ఇజ్రాయెల్ ప్రభుత్వ విధానాలను విమర్శించడాన్ని, యూదుల పట్ల వ్యతిరేకతగా భావించకూడదు అని ట్రంప్ ఆరోపణలను ఆయన సమర్థవంతంగా తిప్పికొట్టారు. మిచిగాన్ ఓటర్లు మాత్రం డెమోక్రటిక్ అభ్యర్థి అబ్దుల్ ఎల్-సయ్యద్ నిజాయితీని నమ్మి, ఆయనవైపే మొగ్గు చూపి ఈ చారిత్రక రికార్డు విజయాన్ని కట్టబెట్టారు. ఇంతటి సీరియస్ పొలిటికల్ వార్ మధ్యలో కూడా, డాక్టర్ ఎల్-సయ్యద్ తన భార్య తరఫున ఉన్న దక్షిణాది భారతీయ కుటుంబంతో తనకున్న సుదీర్ఘ అనుబంధాన్ని పలుమార్లు ఎంతో గర్వంగా గుర్తు చేసుకున్నారు.
