తెలుగు సినీ పరిశ్రమలో మరో విషాదకర వార్త అభిమానులను కలచివేసింది. ఎన్నో వైవిధ్యమైన పాత్రలతో ప్రేక్షకుల మనసుల్లో ప్రత్యేక స్థానం సంపాదించుకున్న సీనియర్ నటుడు జీవీ నారాయణ రావు ఇక లేరు. కొంతకాలంగా వృద్ధాప్య సమస్యలు, అనారోగ్యంతో బాధపడుతున్న ఆయన గురువారం తెల్లవారుజామున తుదిశ్వాస విడిచారు. ఆయన మరణ వార్త తెలిసిన వెంటనే సినీ పరిశ్రమలో విషాద ఛాయలు అలుముకున్నాయి. పలువురు సినీ ప్రముఖులు, సహచర నటులు, అభిమానులు సోషల్ మీడియా వేదికగా సంతాపం వ్యక్తం చేస్తున్నారు. నటి కరాటే కల్యాణి ఆయన మరణ వార్తను సోషల్ మీడియాలో వెల్లడించడంతో ఈ విషాద వార్త అందరికీ తెలిసింది.దాదాపు ఐదు దశాబ్దాల పాటు నటుడిగా తన ప్రయాణాన్ని కొనసాగించిన జీవీ నారాయణ రావు వందకు పైగా చిత్రాల్లో నటించి ప్రేక్షకుల ఆదరణ పొందారు. వైవిధ్య నటనతో ప్రతి పాత్రకు పూర్తి న్యాయం చేస్తూ సహజమైన నటనతో ప్రత్యేక గుర్తింపు సంపాదించారు. జీవీ నారాయణ రావు కృష్ణా జిల్లా కురుమద్దాలి గ్రామంలో జన్మించారు. అయితే ఆయన బాల్యం, విద్యాభ్యాసం అనంతపురం జిల్లా గుంతకల్లులో జరిగింది. చిన్నప్పటి నుంచే కళలంటే అపారమైన ఆసక్తి ఉండేది. చదువుతో పాటు సంగీతం, నృత్యం, నాటకాలపై ఎక్కువ సమయం కేటాయించేవారు. కళలపై ఉన్న మక్కువతో ప్రముఖ గురువుల వద్ద ప్రత్యేక శిక్షణ కూడా తీసుకున్నారు. భరతనాట్యాన్ని గిడుగు విశాలాక్షి వద్ద అభ్యసించిన ఆయన, కూచిపూడి నృత్యాన్ని నటరాజ రామకృష్ణ వద్ద నేర్చుకున్నారు. అలాగే నటనలో మరింత నైపుణ్యం సాధించేందుకు ప్రముఖ రంగస్థల గురువు ఎ.ఆర్. కృష్ణ వద్ద శిక్షణ పొందారు. ఈ శిక్షణ ఆయన నటనా జీవితానికి బలమైన పునాది వేసిందని చెప్పాలి. విద్యార్థి దశలోనే జీవీ నారాయణ రావు రంగస్థలంపై తన ప్రతిభను చాటుకున్నారు. ‘మహమ్మద్ బిన్ తుగ్లక్’, ‘ప్రతాపరుద్రీయం’, ‘మంచుతెర’ వంటి అనేక నాటకాలలో నటించి మంచి పేరు తెచ్చుకున్నారు. ఆ రోజుల్లోనే తర్వాత తెలుగు సినీ పరిశ్రమలో అగ్ర నటులుగా ఎదిగిన కోట శ్రీనివాసరావు, నూతన్ ప్రసాద్, దేవదాస్ కనకాల వంటి ప్రముఖులతో కలిసి రంగస్థలంపై నటించారు. 1976లో ప్రముఖ దర్శకుడు కె. బాలచందర్ తెరకెక్కించిన ‘అంతులేని కథ’ చిత్రంతో జీవీ నారాయణ రావు తెలుగు సినీ పరిశ్రమలో నటుడిగా అడుగుపెట్టారు. తొలి సినిమాతోనే ఆయన నటనకు మంచి గుర్తింపు లభించింది. సినిమాల్లోకి వచ్చిన తర్వాత కూడా ఆయన నటనపై మరింత పట్టుదలతో ముందుకు సాగారు. అందుకే మద్రాస్ ఫిలిం ఇన్స్టిట్యూట్లో నటనకు సంబంధించిన ప్రత్యేక శిక్షణ పొందారు. అక్కడే అప్పటి యువ నటులు రజనీకాంత్, చిరంజీవితో మంచి పరిచయం ఏర్పడింది. ఆ పరిచయం తర్వాత స్నేహంగా మారింది. జీవితాంతం వారితో సన్నిహిత సంబంధాలు కొనసాగించారు.’అంతులేని కథ’, ‘ముత్యాల పల్లకి’, ‘అంగడి బొమ్మ’, ‘చిలకమ్మ చెప్పింది’, ‘సీతారామయ్య గారి మనవరాలు’, ‘చట్టానికి కళ్లులేవు’, ‘రాజా విక్రమార్క’, ‘గ్యాంగ్ లీడర్’, ‘హిట్లర్’, ‘సాహసం’, ‘స్కైలాబ్’ వంటి చిత్రాల్లో ఆయన చేసిన పాత్రలు ప్రేక్షకులను ఆకట్టుకున్నాయి. నటుడిగా మాత్రమే కాకుండా నిర్మాతగా కూడా జీవీ నారాయణ రావు తన ప్రతిభను చాటుకున్నారు. ‘దేవాంతకుడు’, ‘ఇంటికో రుద్రమ్మ’, ‘యముడికి మొగుడు’, ‘పెళ్లినీకూ శుభం నాకు’ వంటి చిత్రాల నిర్మాణంలో భాగస్వామ్యమయ్యారు. వెండితెరతో పాటు బుల్లితెరపైనా ఆయన తన నటనా ప్రస్థానాన్ని విజయవంతంగా కొనసాగించారు. అనేక టెలివిజన్ సీరియళ్లలో నటిస్తూ కుటుంబ ప్రేక్షకులకు మరింత చేరువయ్యారు. జీవీ నారాయణ రావు మరణ వార్తతో తెలుగు సినీ పరిశ్రమ ఒక్కసారిగా దిగ్భ్రాంతికి గురైంది. మూవీ ఆర్టిస్ట్స్ అసోసియేషన్ (మా) ఆయన మృతిపై సంతాపం వ్యక్తం చేసింది. పలువురు నటులు, దర్శకులు, నిర్మాతలు ఆయన కుటుంబ సభ్యులకు ప్రగాఢ సానుభూతి తెలిపారు. తన సహజమైన నటనతో ఎన్నో పాత్రలకు ప్రాణం పోసిన జీవీ నారాయణ రావు భౌతికంగా మన మధ్య లేకపోయినా, ఆయన నటించిన చిత్రాలు, ఆయన సృష్టించిన మధుర జ్ఞాపకాలు ఎప్పటికీ చిరస్థాయిగా నిలిచిపోతాయని సినీ అభిమానులు గుర్తు చేసుకుంటున్నారు.
