కరోనా మళ్లీ ఎంటర్ అయ్యిందా..? ప్రపంచ దేశాలను వణికించడం మొదలు పెట్టిందా..? తూర్పుఆసియా దేశాల్లో కరోనా వ్యాప్తి ఎలా ఉంది..? భారత్ దేశంలో కరోనా కేసులు ఎందుకు పెరుగుతున్నాయి..? ఈ కేసులు ప్రమాదకరమా..? కేంద్రం ఏం అంటోంది..? మనం ఎలాంటి జాగ్రత్తలు తీసుకోవాలి…?
ప్రపంచవ్యాప్తంగా కరోనా వైరస్ మళ్లీ ఆందోళన కలిగిస్తోంది. సింగపూర్, హాంకాంగ్, చైనా, థాయిలాండ్ వంటి దక్షిణ ఆసియా దేశాల్లో కరోనా కేసులు వేగంగా పెరుగుతున్నాయి. ఈ పెరుగుదలకు ప్రధాన కారణం JN.1 వేరియంట్ గా భావిస్తున్నారు. దీనికి LF.7, NB.1.8 అనే సబ్-వేరియంట్లు కూడా ఉన్నాయి. ఈ వేరియంట్లు ఒమిక్రాన్ BA.2.86 లైనేజ్ నుంచి వచ్చినవి. పేరు ఏదైనా కరోనా అంటే అందరికీ భయమే. కొత్త వేరియంట్లు రోగనిరోధక శక్తిని తగ్గిస్తున్నాయి. సింగపూర్లో గత కొన్ని వారాల్లో కేసులు రెట్టింపు అయ్యాయి. చైనాలో కూడా ప్రమాదకర స్థాయిలో కేసులు నమోదవుతున్నాయి. JN.1 వేరియంట్లో సుమారు 30 మ్యూటేషన్లు ఉన్నాయి. ఈ వేరియంట్ లక్షణాలు సాధారణంగా ఒమిక్రాన్ లాంటివే అంటున్నారు. పొడి దగ్గు, జ్వరం, గొంతునొప్పి, తలనొప్పి, వాసన లేదా రుచి కోల్పోవడం, అలసట ఈ వేరియంట్ సొకినప్పుడు కనిపిస్తున్నాయి. కొన్ని సందర్భాల్లో డయేరియా లక్షణాలు కూడా కనపడుతున్నాయి. ఈ వేరియంట్ సాధారణంగా స్వల్ప తీవ్రతతో ఉంటుంది. చాలామంది రోగులు 2-3 రోజుల్లో కోలుకుంటున్నారు. అయితే, వృద్ధులు, దీర్ఘకాలిక వ్యాధులున్నవారు జాగ్రత్తగా ఉండాలి. సింగపూర్, హాంకాంగ్లో JN.1 ఉప-వేరియంట్లు LF.7, NB.1.8 కారణంగా కేసులు వేగంగా పెరుగుతున్నాయి. సింగపూర్లో గత నెలలో కేసులు రెట్టింపు అయ్యాయి. హాంకాంగ్లో ఆసుపత్రుల్లో రోగుల సంఖ్య పెరిగింది. చైనాలో అయితే కేసులు ప్రమాదకర స్థాయిలో పెరుగుతున్నాయి. థాయిలాండ్లో కూడా కేసులు నమోదవుతున్నాయి. అయితే తీవ్రత తక్కువగా ఉంది. ప్రపంచవ్యాప్తంగా, JN.1 వేరియంట్ వల్ల కేసులు పెరుగుతున్నప్పటికీ, మరణాల రేటు 2% కంటే తక్కువగా ఉంది. అయితే, ఈ వేరియంట్ వ్యాప్తి వేగం ఎక్కువ కావడంతో, అనేక దేశాలు మాస్క్లు, సామాజిక దూరం వంటి జాగ్రత్తలను తిరిగి అమలు చేస్తున్నాయి.
మరోవైపు ఈ పరిస్థితి భారత్లోనూ ఆందోళన కలిగిస్తోంది. ఎందుకంటే గత కొన్ని వారాలుగా భారత్ లో కూడా కేసులు పెరుగుతున్నాయి. ఈ కేసులు ప్రధానంగా కేరళ, మహారాష్ట్ర, తమిళనాడు రాష్ట్రాల్లో నమోదవుతున్నాయి. అయితే, కేంద్ర ఆరోగ్య శాఖ ప్రకారం, ఈ కేసులు స్వల్ప తీవ్రతతో ఉన్నాయని.. చాలావరకు ఆసుపత్రిలో చేరాల్సిన అవసరం లేకుండా తగ్గిపోతున్నాయని అంటున్నారు. డిసెంబర్ నుంచి కేసులు స్వల్పంగా పెరుగుతున్నాయి. కరోనా వచ్చినప్పటి నుంచి దేశంలో మొత్తం 44.7 మిలియన్ కేసులు, 5.3 లక్షల మరణాలు ఇప్పటివరకు నమోదయ్యాయి. కానీ ప్రస్తుతం భారత్ లో పరిస్థితి అదుపులోనే ఉందని కేంద్రం స్పష్టం చేసింది. ఇటీవల డైరెక్టర్ జనరల్ ఆఫ్ హెల్త్ సర్వీసెస్ నేతృత్వంలో జరిగిన సమీక్షా సమావేశంలో నేషనల్ సెంటర్ ఫర్ డిసీజ్ కంట్రోల్, ఇండియన్ కౌన్సిల్ ఆఫ్ మెడికల్ రీసెర్చ్, డిజాస్టర్ మేనేజ్మెంట్ సెల్, సెంట్రల్ హాస్పిటల్స్ నిపుణులు పాల్గొన్నారు. ప్రస్తుతం ఉన్న యాక్టివ్ కేసులు భారత జనాభాతో పోలిస్తే చాలా తక్కువని.. ఆందోళన పడాల్సిన పని లేదని అధికారులు తెలిపారు. అయితే, పరీక్షలు, జెనోమిక్ సీక్వెన్సింగ్, వైద్య పరీక్షల పెంచాలని రాష్ట్రాలకు సూచించారు. ముందు జాగ్రత్తగా, గతంలో విజయవంతంగా అమలైన క్లస్టర్ కంటైన్మెంట్ వ్యూహాన్ని కొనసాగించాలని కేంద్రం సూచించింది.
ప్రస్తుతం భారత్లో కరోనా కేసుల పెరుగుదలకు JN.1 వేరియంట్ కారణంగా కావొచ్చని నిపుణులు అనుమానిస్తున్నారు. ఇందులో స్పైక్ ప్రోటీన్లో ఒక ప్రత్యేక మ్యూటేషన్ ఉంది, ఇది రోగనిరోధక శక్తిని తగ్గించి.. వైరస్ వ్యాప్తి వేగాన్ని పెంచుతుంది. భారత్లో ఉపయోగిస్తున్న వ్యాక్సిన్లు—కోవిషీల్డ్, కోవాక్సిన్, స్పుత్నిక్ V.. ముఖ్యంగా డెల్టా వేరియంట్పై సమర్థవంతంగా పనిచేశాయని గత అధ్యయనాలు చెబుతున్నాయి. అయితే, JN.1 వేరియంట్పై వీటి ప్రభావం గురించి పూర్తి స్పష్టత లేదు. ఎందుకంటే ఈ వేరియంట్పై పరిశోధనలు ఇంకా కొనసాగుతున్నాయి. ప్రస్తుతం బైవాలెంట్, మోనోవాలెంట్ mRNA వ్యాక్సిన్లు, JN.1 వేరియంట్ వల్ల తీవ్రమైన అనారోగ్యం, ఆసుపత్రిలో చేరడం, మరణాలను నిరోధించడంలో ప్రభావవంతంగా పనిచేస్తున్నాయని నిపుణులు చెబుతున్నారు. అయితే, ఇన్ఫెక్షన్లను నిరోధించడంలో ఈ వ్యాక్సిన్లు పూర్తిగా సమర్థవంతంగా పనిచేయకపోవచ్చు. భారత్లో ఉపయోగించే కోవిషీల్డ్, కోవాక్సిన్లు గతంలో డెల్టా వేరియంట్పై 60 నుంచి 80 శాతం సమర్థత చూపాయి. కానీ JN.1 వంటి కొత్త వేరియంట్పై వీటి సమర్థత తక్కువగా ఉండొచ్చని అధ్యయనాలు చెబుతున్నాయి. ముఖ్యంగా XBB.1.5 వేరియంట్ కోసం కొత్త బూస్టర్ డోస్లు రోగనిరోధక శక్తిని పెంచడంలో కీలక పాత్ర పోషిస్తాయని ప్రపంచ ఆరోగ్య సంస్థ సూచించింది. భారత్లో బూస్టర్ డోస్లు పరిమితంగా ఉన్నాయి, కానీ అర్హులైన వారు దీన్ని తీసుకోవడం మంచిది. గతంలో డెల్టా వేరియంట్ పై కోవిషీల్డ్ 59.8% సమర్థత చూపగా, కోవాక్సిన్ 65.2% సమర్థత చూపిందని అధ్యయనాలు తెలిపాయి. ఈ వ్యాక్సిన్లు తీవ్రమైన అనారోగ్యం రాకుండా, ఆసుపత్రిలో చేరాల్సిన పనిలేకుండా బాగా పనిచేశాయి. డెల్టా వేరియంట్పై కోవాక్సిన్ 93.4% సమర్థతతో పనిచేసింది. అయితే, JN.1 వేరియంట్లో ఉన్న అదనపు మ్యూటేషన్లు వ్యాక్సిన్లు ఉత్పత్తి చేసే యాంటీబాడీలను గుర్తించకపోవచ్చు. ఇది స్వల్ప ఇన్ఫెక్షన్ల సంఖ్యను పెంచే అవకాశం ఉంది. కానీ తీవ్ర లక్షణాలను నిరోధించడంలో వ్యాక్సిన్లు ఇంకా ప్రభావవంతంగా ఉన్నాయని నిపుణులు చెబుతున్నారు.
సింగపూర్, హాంకాంగ్లో JN.1 వేరియంట్ కారణంగా కేసులు పెరుగుతున్నాయి. కానీ అక్కడ వ్యాక్సిన్లు సమర్థవంతంగా పనిచేస్తున్నాయి. ఉదాహరణకు, సింగపూర్లో ఫైజర్, మోడర్నా వంటి mRNA వ్యాక్సిన్లు JN.1 వేరియంట్పై 70-80% సమర్థత చూపుతున్నాయని డేటా సూచిస్తోంది. ఇజ్రాయెల్, యూకే వంటి దేశాల్లో బూస్టర్ డోస్లు తీవ్ర లక్షణాలను నిరోధించడంలో గణనీయంగా సహాయపడ్డాయి. అయితే, ఈ దేశాల్లో ఎక్కువగా mRNA వ్యాక్సిన్లు ఉపయోగిస్తున్నారు. ఇవి భారత్లో కొంతవరకే అందుబాటులో ఉన్నాయి. భారత్లో ఉపయోగించే కోవిషీల్డ్, కోవాక్సిన్లు JN.1పై పూర్తి స్థాయిలో పరీక్షించబడలేదు. కానీ ఒమిక్రాన్ లైనేజ్పై గతంలో చూపిన సమర్థత ఆధారంగా, తీవ్ర అనారోగ్య పాలుకాకుండా ఇవి ఇంకా ప్రభావం చూపే అవకాశం ఉంది. JN.1 వేరియంట్ను ఎదుర్కోవడంలో బూస్టర్ డోస్లు కీలకం. WHO సిఫారసు చేసిన XBB.1.5 ఆధారిత బూస్టర్ డోస్లు రోగనిరోధక శక్తిని గణనీయంగా పెంచుతాయని అధ్యయనాలు చెబుతున్నాయి. భారత్లో బూస్టర్ డోస్లు 60 ఏళ్లు పైబడిన వారు, దీర్ఘకాలిక వ్యాధులున్నవారికి ప్రధానంగా సిఫారసు చేయబడ్డాయి. అయితే, బూస్టర్ డోస్ల లెక్క దేశవ్యాప్తంగా తక్కువగా ఉంది, దీనిని పెంచడం ద్వారా JN.1 వంటి కొత్త వేరియంట్లను సమర్థవంతంగా ఎదుర్కోవచ్చు.
JN.1 వేరియంట్పై వ్యాక్సిన్ల సమర్థత పూర్తి స్థాయిలో తెలియకపోయినా, ప్రజలు కొన్ని జాగ్రత్తలు తీసుకోవడం మంచిది. రద్దీ ప్రదేశాల్లో మాస్క్ ధరించడం, తరచూ చేతులు కడగడం, లక్షణాలు కనిపిస్తే ఇంట్లో ఉండడం, వెంటనే వైద్య సలహా తీసుకోవడం అవసరం. అర్హులైనవారు బూస్టర్ డోస్ తీసుకోవడం ద్వారా రోగనిరోధక శక్తిని పెంచుకోవచ్చు. వృద్ధులు, దీర్ఘకాలిక వ్యాధులున్నవారు ప్రత్యేక జాగ్రత్తలు తీసుకోవాలి, ఎందుకంటే వీరిలో తీవ్ర లక్షణాల వచ్చే ప్రమాదం ఎక్కువ. ప్రస్తుత పరిస్థితిలో ప్రజలు కొన్ని సాధారణ జాగ్రత్తలు తీసుకోవాలని నిపుణులు సూచిస్తున్నారు. రద్దీగా ఉండే చోట్ల మాస్క్ ధరించడం, తరచూ చేతులు సబ్బుతో కడగడం లేదా శానిటైజర్ వాడడం, సామాజిక దూరం పాటించడం ముఖ్యం. జ్వరం, దగ్గు, గొంతునొప్పి వంటి లక్షణాలు కనిపిస్తే వెంటనే వైద్యుడిని సంప్రదించాలి, కానీ ప్రతి ఒక్కరూ టెస్ట్ చేయించుకోవాల్సిన అవసరం లేదని డాక్టర్లు చెబుతున్నారు. దీర్ఘకాలిక వ్యాధులున్నవారు, గర్భిణీలు పబ్లిక్ ప్లేసుల్లో మాస్క్ తప్పనిసరిగా ధరించాలి. కోవిడ్ రెండు డోసుల వ్యాక్సిన్ తీసుకున్నవారు, అర్హులైతే ప్రికాషన్ డోస్ తీసుకోవాలి. ఇంట్లో వెంటిలేషన్ బాగుండేలా చూసుకోవడం, పబ్లిక్ ప్లేసులకు వెళ్లకపోవడం కూడా సహాయపడుతుంది.