ఎప్పటి నుండో ఎదురుచూస్తున్న తెలుగు రాష్ట్రాల రైల్వే ప్రయాణికుల నిరీక్షణకు తెరపడింది. పండగలు వచ్చినా, సెలవులు వచ్చినా ‘స్పెషల్ ట్రైన్’ టికెట్ల కోసం వెతుక్కోవాల్సిన పని లేకుండా.. అదనపు ఛార్జీల భారం పడకుండా కేంద్ర ప్రభుత్వం అదిరిపోయే గుడ్ న్యూస్ అందించింది. ప్రధాని మోదీ నాయకత్వంలో, కేంద్ర మంత్రి కిషన్ రెడ్డి చొరవతో తెలంగాణ, ఏపీ వాసుల ప్రయాణ కష్టాలు తీర్చేలా మూడు కీలక రైళ్లను రెగ్యులర్ సర్వీసులుగా మారుస్తూ ఉత్తర్వులు వెలువడ్డాయి. హైదరాబాద్ – విశాఖపట్నం (వయా విజయవాడ)… ఈ రూట్ లో పాసెంజర్స్ రద్దీ ఎప్పుడూ అత్యధికంగా ఉంటుంది. ఇప్పుడు ఇది రెగ్యులర్ కావడంతో నిత్యం ప్రయాణించే ఉద్యోగులు,స్టూడెంట్స్ కు ఉపశమనం లభించనుంది. సికింద్రాబాద్ – తిరుపతి: ఆధ్యాత్మిక నగరానికి వెళ్లే భక్తుల కోసం నడిచే ఈ రైలు ఇకపై పక్కా టైమ్ టేబుల్ తో అందుబాటులో ఉంటుంది. కాచిగూడ – గుంటూరు: ఈ రెండు నగరాల మధ్య వాణిజ్య సంబంధాలు ఎక్కువ. ఈ రైలు రెగ్యులరైజేషన్ వల్ల వ్యాపారులకు ఎంతో మేలు జరుగుతుంది.
రెగ్యులర్ సర్వీసుగా మారడం వల్ల కేవలం పేరు మారడమే కాదు, ప్రయాణికులకు క్షేత్రస్థాయిలో అనేక లాభాలు చేకూరుతాయి. సాధారణంగా ‘స్పెషల్ ట్రైన్స్’ అంటే 1.3 రెట్లు అదనపు ఛార్జీలు వసూలు చేస్తారు. ఇప్పుడు రెగ్యులర్ కావడంతో సామాన్యుడిపై ఆర్థిక భారం తగ్గుతుంది.రెగ్యులర్ రైళ్లలో 120 రోజుల ముందే రిజర్వేషన్ చేసుకునే అవకాశం ఉంటుంది. దీనివల్ల ప్రయాణానికి నెలల ముందే ప్లాన్ చేసుకోవచ్చు. స్పెషల్ రైళ్లకు రైల్వే ట్రాక్ క్లియరెన్స్లో రెండో ప్రాధాన్యత ఉంటుంది. కానీ రెగ్యులర్ సర్వీసులు కావడం వల్ల ఇవి నిర్ణీత సమయానికి గమ్యస్థానాలకు చేరుకుంటాయి. రెగ్యులర్ రైళ్లలో మెయింటెనెన్స్ మరియు కోచ్ల నాణ్యత మెరుగ్గా ఉంటుంది. ప్రధాని మోదీ హయాంలో రైల్వే మౌలిక సదుపాయాల కల్పనపై ప్రత్యేక దృష్టి సారించారు. తెలంగాణలోని సికింద్రాబాద్, హైదరాబాద్ స్టేషన్ల ఆధునీకరణతో పాటు ఏపీలోని ప్రధాన జంక్షన్ల అభివృద్ధి వేగంగా జరుగుతోంది. తాజాగా మూడు రైళ్లను రెగ్యులర్ చేయడం ద్వారా తెలుగు రాష్ట్రాల మధ్య అనుసంధానం మరింత బలపడింది. ఇది కేవలం ప్రయాణ సౌకర్యమే కాదు, రెండు రాష్ట్రాల మధ్య ఆర్థిక లావాదేవీలు పెరగడానికి, పర్యాటక రంగం పుంజుకోవడానికి దోహదపడుతుంది.