కలియుగ వైకుంఠమైన తిరుమలలో వైకుంఠ ఏకాదశి (ముక్కోటి ఏకాదశి) వేడుకలు అత్యంత వైభవంగా జరుగుతున్నాయి. నేడు మంగళవారం (డిసెంబర్ 30, 2025) ఉదయం 9 నుంచి 11 గంటల వరకు శ్రీదేవి, భూదేవి సమేత మలయప్ప స్వామి వారు దేదీప్యమానంగా వెలిగిపోతున్న స్వర్ణ రథంపై తిరుమాడ వీధుల్లో విహరిస్తూ భక్తులకు దర్శనమిచ్చారు. గోవింద నామస్మరణలతో మారుమోగిన ఈ రథోత్సవంలో మహిళా భక్తులు అధిక సంఖ్యలో పాల్గొని భక్తిశ్రద్ధలతో రథాన్ని లాగడం విశేషం.తెల్లవారుజాము నుండే వైకుంఠ ద్వారాలు తెరుచుకోవడంతో లక్షలాది మంది భక్తులు ఉత్తర ద్వార దర్శనం చేసుకుని పునీతులవుతున్నారు. ఇక రేపు బుధవారం (డిసెంబర్ 31) వైకుంఠ ద్వాదశిని పురస్కరించుకుని స్వామి పుష్కరిణి వద్ద తీర్థ ముక్కోటి నిర్వహించనున్నారు. వేకువజామున 4:30 నుంచి 5:30 గంటల వరకు శ్రీ సుదర్శన చక్రత్తాళ్వార్లకు అత్యంత పవిత్రమైన చక్రస్నాన మహోత్సవం జరగనుంది. ఈ పది రోజుల వైకుంఠ ద్వార దర్శన పర్వం జనవరి 8, 2026 వరకు కొనసాగుతుందని టీటీడీ అధికారులు వెల్లడించారు.
