ఆంధ్రప్రదేశ్ రాష్ట్రంలో పరిపాలన సౌలభ్యంతో పాటుగా, వికేంద్రీకరణ లక్ష్యంగా చేపట్టిన జిల్లాల పునర్వ్యవస్థీకరణ ప్రక్రియ నేటి నుండి అధికారికంగా అమలులోకి వచ్చింది.దీనికి సంబంధించి ప్రభుత్వం తుది నోటిఫికేషన్ను విడుదల చేయడంతో, రాష్ట్రంలో మొత్తం జిల్లాల సంఖ్య 28కి చేరింది.గతంలో ఉన్న 26 జిల్లాలకు అదనంగా, ప్రజల విజ్ఞప్తులు మరియు భౌగోళిక పరిస్థితులను పరిగణనలోకి తీసుకుని కొత్తగా మరో రెండు జిల్లాలను ఏర్పాటు చేస్తూ ప్రభుత్వం నిర్ణయం తీసుకుంది.పాలనను ప్రజలకు మరింత చేరువ చేయడమే కాకుండా, కలెక్టరేట్లు మరియు పోలీస్ కార్యాలయాల ద్వారా సేవలను వేగవంతం చేయాలని ప్రభుత్వం భావిస్తోంది.
కొత్త జిల్లాల ఏర్పాటుతో ఆయా ప్రాంతాల్లో మౌలిక సదుపాయాల కల్పన , రియల్ ఎస్టేట్ రంగం పుంజుకోనుంది.ఈ చారిత్రక మార్పు ద్వారా వెనుకబడిన ప్రాంతాల అభివృద్ధిపై ప్రత్యేక దృష్టి సారించే అవకాశం ఉందని విశ్లేషకులు భావిస్తున్నారు.కొత్త జిల్లాల్లో తక్షణమే పాలన సాగించేలా తాత్కాలిక భవనాలను సిద్ధం చేయాలని అధికారులను ఆదేశించారు.నోటిఫికేషన్ విడుదలైన వెంటనే ఆయా జిల్లాలకు కొత్త కలెక్టర్లు,ఎస్పీల నియామక ప్రక్రియను కూడా ప్రభుత్వం పూర్తి చేసింది.నేటి నుండి కొత్త జిల్లాల పరిధిలో ప్రజలు తమ అధికారిక పనులను ఆయా కేంద్రాల్లోనే పూర్తి చేసుకోవచ్చు.