సంక్రాంతి అంటే కేవలం ఒక పండుగ మాత్రమే కాదు, అది తెలుగువారి సంస్కృతికి అద్దం పట్టే ఒక మహా వైభవం. ముఖ్యంగా గోదావరి జిల్లాలు ఈ సంబరాలకు కేరాఫ్ అడ్రస్గా నిలుస్తాయి. పచ్చని పొలాలు, గలగల పారే గోదావరి పాయలు, ఇంటి ముందు రంగవల్లులు, హరిదాసుల కీర్తనలు మరియు గంగిరెద్దుల విన్యాసాలతో ఈ ప్రాంతం ఒక స్వర్గలోకాన్ని తలపిస్తుంది. అతిథి మర్యాదలకు పెట్టింది పేరు అయిన గోదావరి వాసులు, సంక్రాంతి వేళ తమ ఊరిని, సంప్రదాయాలను ప్రపంచానికి చాటిచెప్పేలా ఉత్సవాలను నిర్వహిస్తారు. ఈ క్రమంలోనే డాక్టర్ బీఆర్ అంబేడ్కర్ కోనసీమ జిల్లాలోని ఆత్రేయపురం ఇప్పుడు పండుగ సందడితో కళకళలాడుతోంది.
రాష్ట్ర ప్రభుత్వం అత్యంత ప్రతిష్టాత్మకంగా నిర్వహిస్తున్న ‘సర్ ఆర్థర్ కాటన్ గోదావరి ట్రోఫీ’ ఆత్రేయపురానికి సరికొత్త ఊపును ఇచ్చింది. పూతరేకుల తీపికి నిలయమైన ఈఅద్భుతమైన ప్రాంతంలో, ఇప్పుడు సాహస క్రీడల జోరు మొదలైంది. తొలిరోజు రంగవల్లుల పోటీలు, ఈత పోటీలు మరియు నోరూరించే ఫుడ్ ఫెస్టివల్తో ప్రారంభమైన సంబరాలు, రెండో రోజు నాటికి డ్రాగన్ పడవల పోటీలతో పీక్స్కు చేరుకున్నాయి. సుమారు 250 మంది క్రీడాకారులు దేశంలోని వివిధ ప్రాంతాల నుండి తరలివచ్చి గోదావరి జలాలపై తమ సత్తా చాటుతుంటే, ఎమ్మెల్యే బండారు సత్యానందరావు ఆధ్వర్యంలో జరుగుతున్న ఈ వేడుకలు కోనసీమ పర్యాటక రంగానికి మకుటాయమానంగా నిలుస్తున్నాయి.