ఒకే ఒక్కడు..30 ఇయర్స్ ట్రెండ్ సెట్టర్ జర్నీ..కళ్యాణ్ బాబు TO ఏపీ డిప్యూటీ సీఎం

తెలుగు చలనచిత్ర చరిత్రలో కొందరు నటులు వస్తారు, వెళతారు. కానీ కొందరు మాత్రమే ఒక ట్రెండ్ ను సెట్ చేస్తారు. ఆ ట్రెండ్‌ను ఫాలో అయ్యేలా ఒక తరాన్ని ప్రభావితం చేస్తారు. అలాంటి ఒక సెన్సేషన్ పేరు పవన్ కళ్యాణ్. మెగాస్టార్ చిరంజీవి తమ్ముడిగా ఇండస్ట్రీలోకి అడుగుపెట్టినా, తనకంటూ ఒక సెపరేట్ మేనరిజం, స్టైల్, ఆటిట్యూడ్‌తో పవర్ స్టార్ గా ఎదిగారు. హిట్లు, ఫ్లాపులతో ఏమాత్రం సంబంధం లేని కల్ట్ ఫ్యాన్ బేస్‌ను సొంతం చేసుకున్నారు. సిల్వర్ స్క్రీన్ పై ఎన్నో రికార్డులను తిరగరాసిన పవన్ కళ్యాణ్, తన సినీ ప్రస్థానంలో ఒక మైలురాయిని చేరుకున్నారు. తెలుగు ఇండస్ట్రీలోకి హీరోగా ఎంట్రీ ఇచ్చి 30 సంవత్సరాలు పూర్తయ్యాయి. 1996 అక్టోబర్ 11న అక్కడ అమ్మాయి ఇక్కడ అబ్బాయి సినిమాతో పరిచయమైన కల్యాణ్ బాబు.. నేడు ఆంధ్రప్రదేశ్ రాష్ట్రానికి డిప్యూటీ సీఎం స్థాయికి ఎదిగారు.

1996కి ముందు తెలుగు ఆడియన్స్‌కు ఆయన మెగాస్టార్ చిరంజీవి తమ్ముడు కొణిదెల కల్యాణ్ బాబు మాత్రమే. అక్టోబర్ 11, 1996న ఇవివి సత్యనారాయణ దర్శకత్వంలో గీతా ఆర్ట్స్ బ్యానర్‌లో వచ్చిన ' అక్కడ అమ్మాయి ఇక్కడ అబ్బాయి సినిమాతో వెండితెరకు పరిచయమయ్యారు. తొలి సినిమాలోనే రియల్ మార్షల్ ఆర్ట్స్ స్టంట్స్ చేసి అందరినీ ఆశ్చర్యపరిచారు పవన్ కళ్యాణ్. కానీ, చిరంజీవి తమ్ముడు అనే ట్యాగ్‌లైన్ నుంచి బయటపడి, తనకంటూ ఒక ప్రత్యేకమైన ఇమేజ్ క్రియేట్ చేసుకోవడం అంత సులువు కాలేదు. ఆ తర్వాత వచ్చిన గోకులంలో సీత సినిమా ఆయనకు నటుడిగా మంచి గుర్తింపు తెచ్చింది. ఇక సుస్వాగతం సినిమాతో తొలిసారి బ్లాక్ బస్టర్ హిట్ అందుకున్నారు. కాలేజీ స్టూడెంట్ గా పవన్ నటన, ముఖ్యంగా ఆ సినిమాలో ఆయన ఎనర్జీ, స్టైల్ చూసి యూత్ మొత్తం ఫిదా అయిపోయింది. అక్కడి నుంచే టాలీవుడ్లో ఒక కొత్త స్టార్ ఉదయిస్తున్నాడన్న విషయం ఇండస్ట్రీకి అర్థమైంది. సుస్వాగతం సినిమా తర్వాత పవన్ కళ్యాణ్ వెనుతిరిగి చూసుకోలేదు. వరసగా ఆరు బ్లాక్ బస్టర్ హిట్స్.. ఆరేళ్ల పాటు ఆయన సృష్టించిన ప్రభంజనం అంతా ఇంతా కాదు. అప్పటి యువతకు పవన్ కళ్యాణ్ ఒక యూత్ ఐకాన్.