గిన్నిస్ బుక్‌లో భారతీయ సత్తా: ఆర్మీ మాజీ జవాన్ సాహసం.. నాసిక్ శంఖారావం!
భారతదేశ కీర్తికిరీటంలో మరో రెండు అరుదైన రికార్డులు చేరాయి. దేశ నలుమూలల నుంచి వెలువడే ప్రతిభకు, ఆధ్యాత్మిక శక్తులకు అంతర్జాతీయ వేదికపై అరుదైన గుర్తింపు లభించింది. శారీరక దృఢత్వానికి ప్రతీకగా ఒకరు, సాంస్కృతిక సమ్మేళనానికి నిదర్శనంగా మరొకరు సాధించిన ఈ జంట విజయాలు ఇప్పుడు గిన్నిస్ వరల్డ్ రికార్డ్స్‌లో నిలిచాయి. దేశభక్తిని, భక్తిపారవశ్యాన్ని ఒకేసారి చాటిచెప్పిన ఈ రెండు అపూర్వ ఘట్టాలపై ఇప్పుడు ప్రపంచవ్యాప్తంగా ప్రశంసల వర్షం కురుస్తోంది.
దేశ రక్షణలో సేవలందించిన మాజీ ఆర్మీ కమాండో హిమ్మత్ సింగ్ రాథోడ్, మానవ శారీరక సామర్థ్యానికి కొత్త నిర్వచనం చెప్పారు. సాధారణంగా పుషప్స్ తీయడమే కష్టమైన పని, అలాంటిది కేవలం ఒక్క గంట వ్యవధిలోనే ఏకంగా 670 పుషప్స్ తీసి ఆయన సరికొత్త చరిత్ర సృష్టించారు. సైనికుడి క్రమశిక్షణ, నిరంతర సాధన ఎంతటి అసాధ్యాన్ని అయినా సాధ్యం చేయగలవని ఆయన మరోసారి నిరూపించారు. హిమ్మత్ సింగ్ దీనిని సాధారణ పద్ధతిలో చేయకపోవడం గమనార్హం. ఒక కాలిని గాల్లో ఉంచి, వీపుపై ఏకంగా 27.2 కిలోల బరువును మోస్తూ ఈ అసాధారణ ఫీట్‌ను పూర్తి చేశారు. ప్రతీ క్షణం అత్యంత కఠినంగా సాగిన ఈ ప్రక్రియలో ఆయన చూపిన ఏకాగ్రత, పట్టుదల ఆకట్టుకున్నాయి. తన శారీరక, మానసిక దార్ఢ్యంతో దేశానికి మరొక ప్రతిష్టాత్మక గిన్నిస్ రికార్డును సొంతం చేసి భారతీయులందరూ గర్వపడేలా చేశారు. ఇక మరో అద్భుత రికార్డును మహారాష్ట్రలోని పవిత్ర పుణ్యక్షేత్రం నాసిక్‌లో గోదావరి తీరాన భారత్ నమోదు చేసింది. ఒకేసారి 517 మంది భక్తులు శంఖాలను పూరించారు. ఆ శంఖారావం అక్కడ ఉన్న ప్రతి ఒక్కరిలోనూ గూస్‌బంప్స్ తెప్పించింది. ఆ ప్రాంగణమంతా ఆధ్యాత్మిక పరవశాన్ని వ్యాప్తిచేసింది. ఈ అపూర్వ ఆధ్యాత్మిక విన్యాసంతో గతంలో అమెరికా పేరిట ఉన్న రికార్డు పక్కకు పోయింది. అమెరికాలో 303 మంది ఒకేసారి శంఖం ఊది నెలకొల్పిన రికార్డును మన భక్తులు అత్యంత సునాయాసంగా అధిగమించేశారు. ఒకే వేదికపై ఐదు వందలకు పైగా శంఖాలు ఒకే స్వరంలో మ్రోగడం ఒక అరుదైన రికార్డుగా నిలిచింది. ఈ రెండు విభిన్న రంగాల ఘనతలపై ప్రస్తుతం సోషల్ మీడియా వేదికగా నెటిజన్లు, ప్రముఖులు హర్షం వ్యక్తం చేస్తున్నారు. ఒకవైపు వీరత్వానికి, శారీరక దార్ఢ్యానికి నిదర్శనంగా నిలిచిన కమాండో సాహసం.. మరోవైపు మన పూర్వీకుల సాంస్కృతిక వైభవానికి అద్దం పట్టిన శంఖారావం.. రెండూ భారత్‌కు గర్వకారణంగా నిలిచాయని ఆనందం వ్యక్తం చేస్తున్నారు. ఈ అరుదైన విజయాలు ప్రతి భారతీయుడి గుండెల్లో చిరస్థాయిగా నిలిచిపోతాయనడంలో సందేహం లేదు.
