మెగాస్టార్ చిరంజీవి తన సతీమణి సురేఖ పుట్టిన రోజును పురస్కరించుకుని శుభాకాంక్షలు తెలిపారు. ఈ మేరకు ‘ఎక్స్’ లో పోస్ట్ చేశారు. నా ప్రతి అడుగులో నా వెంట నడిచిన సురేఖకు జన్మదిన శుభాకాంక్షలు. ప్రియమైన సురేఖకు పుట్టినరోజు శుభాకాంక్షలు. 1980, ఫిబ్రవరి 20న మనం వివాహం చేసుకున్న రోజు నుండి, నువ్వే నా అతిపెద్ద బలం. ఈరోజు నీ పుట్టినరోజును, అలాగే ముందస్తుగా మన వివాహ వార్షికోత్సవాన్ని జరుపుకుంటున్న వేళ నా హృదయం కృతజ్ఞతతో నిండిపోయింది.నువ్వు మన కుటుంబానికి కేంద్ర బిందువువి, మనందరినీ ప్రేమతో ఒకటిగా ఉంచే శక్తివి. నా కుటుంబ సభ్యులను నీ సొంతవారిలా స్వీకరించి, ప్రతి క్షణం వారికి తోడుగా నిలిచావు. మా తల్లిదండ్రులు నిన్ను ఎంతగానో ప్రేమించారో, నువ్వు కూడా వారికి అంతే గొప్ప కూతురిగా మారావు.
ఎవరైనా నా విజయ రహస్యం ఏమిటని అడిగితే, అది నా ప్రతిభో లేక కష్టమో కాదు.. “అది నువ్వు” అని చెబుతాను. కుటుంబ బాధ్యతలన్నింటినీ నువ్వు నిశ్శబ్దంగా, సమర్థవంతంగా భుజాన వేసుకున్నావు కాబట్టే, నేను నా వృత్తిపై పూర్తి దృష్టి పెట్టగలిగాను. కష్టాల్లోనైనా, సంతోషాల్లోనైనా మనల్ని కలిపి ఉంచేది నువ్వే. నువ్వు కేవలం నా భార్యవి మాత్రమే కాదు.. నా బలం, నా ఆధారం, నా ప్రశాంతత. ఈరోజు నీ పుట్టినరోజు సందర్భంగా, మరియు మన పెళ్లిరోజు దగ్గరపడుతున్న తరుణంలో, నా మనసు లోతుల్లో నుండి ఒక మాట చెబుతున్నాను – నేను ఈ స్థాయిలో ఉన్నానంటే దానికి కారణం నువ్వే.ఎల్లప్పుడూ నీపై అదే ప్రేమతో..అంటూ మెగాస్టార్ ఆత్మీయంగా రాసుకొచ్చారు.