తనదైన నటనతో పలు విభిన్నమైన పాత్రలతో ప్రేక్షకులను అలరిస్తూ ముందుకు సాగుతున్న ప్రముఖ నటి సమంతకు అరుదైన గౌరవం దక్కింది. 77వ రిపబ్లిక్ డే సందర్భంగా ఆమెకు రాష్ట్రపతి ద్రౌపది ముర్ము ఏర్పాటు చేసిన ‘ఎట్ హోమ్’ విందుకు ఆహ్వానం అందింది. ఈ ప్రతిష్ఠాత్మక కార్యక్రమానికి హాజరైన సమంత సోషల్ మీడియాలో తన ఆనందాన్ని వ్యక్తం చేశారు. తన కెరీర్ లో ఇలాంటి ఒక రోజు వస్తుందని కలలో కూడా ఊహించలేదని, తన అదృష్టం, మాతృభూమి వల్లే ఇది సాధ్యమైందని పేర్కొన్నారు. ఈ మేరకు ఇన్స్టాగ్రామ్లో ఆమె స్పందిస్తూ, ఎప్పటికైనా ఇలాంటి వేదికపై నిలుచుంటానని నా అంతరాత్మ కూడా చెప్పలేదు. ఎలాంటి మార్గం కనిపించలేదు. ఇలాంటి కలలు కనడానికి కూడా అప్పట్లో సాహసించలేదు. కానీ నా పని నేను చేసుకుంటూ ముందుకు వెళ్లాను. ఈ దేశం తన కృషికి తగిన గుర్తింపు ఇచ్చిందని అందుకు దీనికి ఎప్పటికీ రుణపడి ఉంటానని రాసుకొచ్చారు.ఈ కార్యక్రమానికి సమంత సంప్రదాయబద్ధంగా హాజరయ్యారు.. రాష్ట్రపతి భవన్లో దిగిన పలు ఫొటోలను, విందుకు సంబంధించిన ఆహ్వాన పత్రాన్ని కూడా ఆమె షేర్ చేశారు. ఈ విందులో ప్రధాని నరేంద్ర మోదీ, ఉపరాష్ట్రపతి సి.పి. రాధాకృష్ణన్ సహా జాతీయ, అంతర్జాతీయ ప్రముఖులు పాల్గొన్నారు.
