దేశవ్యాప్తంగా సంచలన విజయాన్ని అందుకుని బాక్సాఫీసు రికార్డులను తిరగరాసిన పుష్ప -2 సినిమా తాజాగా జపాన్ ప్రేక్షకులను అలరించేందుకు రెడీ అయింది. ఈ నెల 16న ‘పుష్ప కున్రిన్’ పేరుతో జపాన్ ప్రేక్షకుల ముందుకు రానుంది. ఈ నేపథ్యంలో ఐకాన్ స్టార్ అల్లు అర్జున్ తన కుటుంబంతో కలిసి టోక్యో పర్యటనకు వెళ్లారు. టోక్యోకు చేరుకున్నట్లు అల్లు అర్జున్ తాజాగా ఓ ఫొటోను పంచుకున్నారు. పుష్ప2 సినిమాను జపాన్ లో గీక్ పిక్చర్స్, షోచికు సంస్థలు సంయుక్తంగా విడుదల చేయనున్నాయి. ఈ నేపథ్యంలో సదరు నిర్మాణ సంస్థల ప్రతినిధులు అల్లు అర్జున్ కు స్వాగతం పలుకుతూ, పుష్ప విడుదలను సోషల్ మీడియా వేదికగా ప్రకటించారు. జపనీస్ భాషలోకి సినిమాను డబ్ చేసి ఇటీవల సినిమా పోస్టర్, ట్రెయిలర్లను విడుదల చేశారు.
‘పుష్ప’ కేవలం ఒక సినిమాగా మాత్రమే కాకుండా, ఒక పాన్-ఇండియా సంచలనంగా నిలిచింది. దర్శకుడు సుకుమార్ రూపొందించిన ఈ చిత్రం ఎర్రచందనం స్మగ్లింగ్ నేపథ్యంతో సాగుతుంది. ఒక సామాన్యుడు అసామాన్యుడిగా, స్మగ్లింగ్ సామ్రాజ్యానికి అధిపతిగా ఎలా ఎదిగాడనే కథను అత్యంత సహజంగా, మాస్ ఎలిమెంట్స్తో తెరకెక్కించడం ప్రేక్షకులను విశేషంగా ఆకట్టుకుంది. భాషా భేదం లేకుండా దేశవ్యాప్తంగా ఈ చిత్రం భారీ వసూళ్లను సాధించింది.
అల్లు అర్జున్ తన కెరీర్లోనే అత్యుత్తమ ప్రదర్శనను ఈ చిత్రంలో కనబరిచారు. ‘పుష్పరాజ్’ పాత్రలో ఆయన బాడీ లాంగ్వేజ్, తగ్గేదే లే అనే మేనరిజం, మరియు చిత్తూరు యాసలో మాట్లాడిన తీరు అద్భుతం. ఒక భుజం పైకి పెట్టి ఆయన నడిచే విధానం ప్రతి ఒక్కరినీ అలరించింది. ఈ పాత్రలో ఆయన చూపిన పరిణతికి గానూ జాతీయ ఉత్తమ నటుడి అవార్డును అందుకోవడం విశేషం.దర్శకుడు సుకుమార్ మేకింగ్ ఈ సినిమాకు ప్రాణవశక్తిని ఇచ్చింది. పాత్రల చిత్రీకరణలో ఆయన చూపే వైవిధ్యం పుష్పలో స్పష్టంగా కనిపిస్తుంది. కేవలం యాక్షన్ మాత్రమే కాకుండా, కథలో ఉన్న ఎమోషన్స్ను కూడా ఆయన చక్కగా బ్యాలెన్స్ చేశారు.
మిగిలిన నటీనటుల విషయానికి వస్తే, శ్రీవల్లిగా రష్మిక మందన్న మంచి నటనతో ఆకట్టుకోగా.. భన్వర్ సింగ్ షెకావత్గా ఫహద్ ఫాసిల్ నటన క్లైమాక్స్లో సినిమాను మరో స్థాయికి తీసుకెళ్లింది. సునీల్, అనసూయలు నెగటివ్ షేడ్స్ ఉన్న పాత్రల్లో ఆకట్టుకున్నారు. వీరి పాత్రలు కథకు మరింత బలాన్ని చేకూర్చాయి. సాంకేతికంగా ఈ సినిమా అత్యున్నత ప్రమాణాలతో తెరకెక్కింది. దేవి శ్రీ ప్రసాద్ అందించిన సంగీతం మరో ప్రధాన ఆకర్షణ. ‘శ్రీవల్లి’, ‘ఊ అంటావా మామ’, ‘సామీ సామీ’ వంటి పాటలు దేశవ్యాప్తంగా మారుమోగాయి. బ్యాక్ గ్రౌండ్ స్కోర్ సినిమా మూడ్ను ఎలివేట్ చేసింది. మిరోస్లావ్ కుబా బ్రోజెక్ సినిమాటోగ్రఫీ అడవిలోని లోతును, సహజత్వాన్ని అద్భుతంగా చూపించింది. మొత్తానికి, చిత్ర యూనిట్ అంతా కలిసి ఒక అద్భుతమైన చిత్రాన్ని ప్రేక్షకులకు అందించారు. ఇప్పుడిక జపాన్ ప్రేక్షకులను అలరించనుంది.