దశాబ్దాలుగా తెలుగు సినీ ప్రేక్షకుల మదిలో తన నటనతో శిఖరాగ్ర స్థానాన్ని కైవసం చేసుకున్నారు మెగాస్టార్ చిరంజీవి. ఈరోజు ఆయన నట జీవితంలో ఒక ప్రత్యేకమైన స్థానముంది. అదేంటంటే ఆయన తన సినీ ప్రస్థానంలో తొలి అడుగు వేసిన రోజు నేడు. ఈ సందర్భాన్ని గుర్తుచేసుకుంటూ సోషల్ మీడియా లో ఆసక్తికర పోస్ట్ పెట్టారు. తన జీవితంలో మొదటిసారి కెమెరా ముందు నిల్చున్నది ఫిబ్రవరి 11నే అని ఆయన తెలిపారు. ‘పునాదిరాళ్లు’ సినిమా కోసం తాను తొలిసారి నటించిన ఆ రోజును గుర్తుచేసుకుంటూ ఆయన ఈ ప్రత్యేక సందేశాన్ని పంచుకున్నారు. ఈరోజు “పునాదిరాళ్లు” సినిమా కోసం జీవితంలో కెమెరా ముందు నిలిచిన తొలి రోజు. ఆ రోజు నాలో కలిగిన ఆత్రుత, ఆనందం, బాధ్యత, భావోద్వేగం మాటల్లో వర్ణించలేనిది. ఆ క్షణం ఇప్పటికీ నిన్న, మొన్న జరిగిందేమో అన్నట్టు అనిపిస్తుంది. ఒక అందమైన చందమామ కథ లాంటి అనుభూతి. ఈ ప్రత్యేక సందర్భంలో, నాకు ఆ తొలి అవకాశం ఇచ్చిన ఆ చిత్ర దర్శక, నిర్మాతలకు హృదయపూర్వకంగా కృతజ్ఞతలు తెలియజేసుకుంటున్నాను. వారి నమ్మకం, ప్రోత్సాహంతో వచ్చిన అవకాశంతో నటనలో నా ప్రయాణానికి పునాది రాళ్లు పడ్డాయి. ఆ రోజు నుంచి ఈ రోజు వరకూ నన్ను ఆదరిస్తూ, ఆశీర్వదిస్తున్న ప్రేక్షకులందరికీ ఈ సందర్భంగా కృతజ్ఞతలు తెలిపారు.
