హైదరాబాద్ యూసుఫ్ గూడలోని కోట్ల విజయభాస్కర్ రెడ్డి ఇండోర్ స్టేడియంలో “అరైవ్ అలైవ్” రోడ్డు భద్రత అవగాహన కార్యక్రమాన్ని సీఎం రేవంత్ రెడ్డి ప్రారంభించారు. దేశంలో ప్రతీ నిముషానికి ఒక రోడ్డు ప్రమాదం జరుగుతుండడం చాలా బాధాకరమని ఈ సందర్భంగా అన్నారు. రోడ్డు ప్రమాదాలను తీవ్రమైన సమస్యగా రాష్ట్ర ప్రభుత్వం పరిగణిస్తోందన్న ఆయన ట్రాఫిక్ వ్యవస్థ ఆరో వేలు మాదిరిగా తయారైందని ఈ విధానాన్ని మార్చాల్సిన అవసరం ఉందని పేర్కొన్నారు. సాంకేతిక నైపుణ్యం ఉపయోగించుకుని ట్రాఫిక్ వ్యవస్థను బలోపేతం చేసుకోవాలని సంపూర్ణ సంస్కరణలతో రోడ్డు ప్రమాదాల నివారణకు చర్యలు తీసుకోవడానికి ప్రభుత్వం సిద్ధంగా ఉందని స్పష్టం చేశారు. ఆ దిశగా అధికారులు ప్రతిపాదనలు సిద్ధం చేయాలన్నారు.
