మేం విడాకులు తీసుకోలేదు.. కృష్ణవంశీతో బంధంపై రమ్యకృష్ణ కీలక వ్యాఖ్యలు!

ఒకప్పటి హీరోయిన్ గా, ఇప్పుడు విలక్షణ పాత్రలతో దశాబ్దాలకు పైగా ప్రేక్షకులను అలరిస్తూముందుకు సాగుతున్నారు నటి రమ్యకృష్ణ . తన అందం, అభినయంతో తెలుగులో కూడా తిరుగులేని నటిగా గుర్తింపు తెచ్చుకున్న ఆమె వ్యక్తిగత జీవితంపై గత కొన్నేళ్లుగా రకరకాల వార్తలు వినిపిస్తూనే ఉన్నాయి. హీరోయిన్ గా టాప్ పొజిషన్ లో ఉన్నప్పుడే క్రియేటివ్ డైరెక్టర్ కృష్ణవంశీని ప్రేమించి పెళ్లి చేసుకుంది రమ్యకృష్ణ. అయితే పెళ్లైన కొన్ని రోజులకే వీళ్లిద్దరి మధ్య మనస్పర్థలు వచ్చాయని, వీరు విడాకులు తీసుకోబోతున్నారని, ఎవరికి వారే యమునా తీరే అన్నట్లుగా విడివిడిగా బతుకుతున్నారని సోషల్ మీడియాలో తరచూ ప్రచారం జరుగుతుంటుంది. సాధారణంగా తన వ్యక్తిగత విషయాలపై ఎక్కడా స్పందించని రమ్యకృష్ణ.. తొలిసారిగా ఈ పుకార్లన్నింటికీ ఒక ఇంటర్వ్యూలో ఫుల్స్టాప్ పెట్టారు. ఒక పాడ్కాస్ట్ ఇంటర్వ్యూలో పాల్గొని తన పర్సనల్ లైఫ్ గురించి ఓపెన్ గా మాట్లాడారు. విడాకుల పుకార్లపై యాంకర్ అడిగిన ప్రశ్నకు సమాధానం చెబుతూ మేము విడిపోలేదు.. వంద శాతం ఇంకా భార్యాభర్తలమే. మా పెళ్లి బంధం చెక్కుచెదరలేదు అని స్పష్టం చేశారు. అయితే వారిద్దరూ ఒక స్పష్టమైన అవగాహనతో, సంతోషంగా వేర్వేరు సిటీల్లో ఉంటున్నామని ఆమె చెప్పారు. రమ్యకృష్ణ చెన్నైలో ఉంటే, కృష్ణవంశీ హైదరాబాద్ లో ఉంటారు. ఇలా ఎందుకు ఉండాల్సి వచ్చిందో కూడా ఆమె వివరించారు. తమ కొడుకు రిత్విక్ పుట్టినప్పుడు ఆమె చెన్నైలో కొన్ని టీవీ సీరియల్స్ చేస్తూ ఫుల్ బిజీగా ఉన్నట్లు చెప్పారు. ఆ సమయంలో ప్రతి 15 రోజులకు ఒకసారి హైదరాబాద్ నుంచి చెన్నైకి ట్రావెల్ చేయాల్సి వచ్చేది. అయితే అలా వచ్చి వెళ్లిన ప్రతిసారీ కొడుకు అనారోగ్యానికి గురయ్యేవాడు. పైగా ఆ సమయంలో హైదరాబాద్ లో తెలంగాణ ఉద్యమం , బంద్లు, స్కూల్ సెలవుల వల్ల వాడి చదువుకు ఆటంకం కలిగింది. దీంతో కృష్ణవంశీతో చర్చించి, వాడిని చెన్నైలోనే చదివించాలని నిర్ణయించుకున్నాం. అలా ఇద్దరి మ్యూచువల్ అంగీకారంతో నేను నా కొడుకుతో చెన్నై షిఫ్ట్ అయ్యాను అని రమ్యకృష్ణ అసలు నిజాన్ని బయటపెట్టారు.
నిజానికి ఇలా వేర్వేరు నగరాల్లో ఉండటం కాలక్రమేణా ఇద్దరికీ ఎంతో సౌకర్యవంతంగా మారిపోయిందట. కృష్ణవంశీ ఒక క్రియేటివ్ పర్సన్. ఆయనకు ఉదయం లేచినప్పటి నుంచి రాత్రి పడుకునే వరకు సినిమా తప్ప మరో ధ్యాస ఉండదు. ఆయన నా వర్క్లోకి రారు.. నేను ఆయన వర్క్లో కలుగజేసుకోను. మేము వేర్వేరుగా ఉండటం వల్ల ఇద్దరికీ కావాల్సినంత పర్సనల్ స్పేస్ దొరికింది. రోజూ చిన్నచిన్న విషయాలకు అరుచుకుని గొడవలు పడకుండా, ఇప్పుడు మేము చాలా మంచి స్నేహితుల్లా ఉంటున్నాం. అందుకేనేమో మేమిద్దరం ఇప్పటికీ భార్యాభర్తలుగా, దంపతులుగా సంతోషంగా ఉన్నాం అని రమ్యకృష్ణ ఎంతో పరిణతితో కూడిన సమాధానం ఇచ్చారు. 1998లో వచ్చిన చంద్రలేఖ సినిమా సెట్స్ లో కృష్ణ వంశికి , రమ్య కృష్ణకి మధ్య ప్రేమ చిగురించింది. ఆ తర్వాత 2003లో వీరు పెళ్లి పీటలెక్కారు. అయితే ఈ ఇంటర్వ్యూలో రమ్యకృష్ణ చెప్పిన ఒక ఆసక్తికరమైన విషయం ఇప్పుడు నెట్టింట వైరల్ అవుతోంది. అదేంటంటే.. పెళ్లికి ముందే కృష్ణవంశీ రమ్యకృష్ణ ముందు ఒక విచిత్రమైన కండిషన్ పెట్టారట. అసలు మనకు పెళ్లి ఎందుకు? దాని బదులు మనం లివ్-ఇన్ రిలేషన్షిప్లో కలిసి ఉందాం అని ఆయన చాలాసార్లు అడిగారట.
దీని గురించి రమ్యకృష్ణ మాట్లాడుతూ.. కొన్నిసార్లు రిలేషన్ షిప్ లో మ్యారేజ్ అనేది ఓవర్ రేటెడ్ అనిపిస్తుంది. కృష్ణవంశీ లివింగ్ టుగెదర్ గురించి చెప్పినప్పుడు.. నేను అప్పుడే దానికి ఎస్ అని చెప్పి ఉండాల్సిందేమో అని ఇప్పుడు నాకనిపిస్తుంది. ఎందుకంటే, పెళ్లి అనేది కేవలం ఇద్దరు వ్యక్తులకు మాత్రమే కాదు, కుటుంబాలతో పాటుగా మన చుట్టూ ఉన్న చాలామందిని ఇన్వాల్వ్ చేస్తుంది. సొసైటీకి మనం ఎన్నో సమాధానాలు చెప్పుకోవాల్సి వస్తుంది. కానీ నాకు, కృష్ణవంశీకి మధ్య ఉన్న రిలేషన్ షిప్ ఎప్పుడూ పర్ఫెక్ట్ గానే ఉంది. అది ఎప్పటికీ అలానే ఉంటుంది అని రమ్యకృష్ణ నవ్వుతూ తన మనసులోని మాటను బయటపెట్టారు. ఒక మగాడు, ఒక ఆడది ఒకే ఇంట్లో ఉంటేనే పెళ్లి.. వేర్వేరు ఊళ్లలో ఉంటే వాళ్లకు విడాకులు అయిపోయినట్లే అని జడ్జ్ చేసే సమాజానికి రమ్యకృష్ణ ఇంటర్వ్యూ ఒక చెంపపెట్టు లాంటిది. ఇద్దరి మధ్య అండర్ స్టాండింగ్ ఉంటే దూరం అనేది ఒక లెక్క కాదు అని రమ్యకృష్ణ, కృష్ణవంశీల బంధం నిరూపించింది.



