ట్రంప్ను చంపేందుకు పాకిస్థానీ ఏజెంట్.. అమెరికాలో 27 ఏళ్ల జైలు శిక్ష!

ప్రపంచానికే పెద్దన్నగా ఉన్న అగ్రరాజ్యానికి అధ్యక్షుడు అంటే ప్రపంచంలోనే అత్యంత శక్తివంతమైన నాయకుడు. ఆయన చుట్టూ ఉండే భద్రత ఏ రేంజ్లో ఉంటుందో చెప్పాల్సిన పని లేదు. అయితే అలాంటి కట్టుదిట్టమైన భద్రతను ఛేదించి, అగ్రరాజ్య నేత డొనాల్డ్ ట్రంప్ను హత్య చేయాలని ఓ భారీ కుట్ర జరిగడం ప్రపంచవ్యాప్తంగా చర్చనీయంశమైంది. ఈ కుట్ర వెనుక ఉన్నది ఏదో లోకల్ గ్యాంగ్ కాదు, ఏకంగా ఒక దేశపు మిలిటరీ ఏజెన్సీ. ఇరాన్కు చెందిన ఇస్లామిక్ రివల్యూషనరీ గార్డ్ కార్ప్స్ ఆదేశాల మేరకు పాకిస్థాన్కు చెందిన అసిఫ్ మర్చంట్ అనే 48 ఏళ్ల వ్యక్తి, అమెరికాలో అడుగుపెట్టి ట్రంప్తో సహా పలువురు ఉన్నతాధికారులను మట్టుబెట్టాలని మాస్టర్ స్కెచ్ వేశాడు. కానీ అమెరికా ఫెడరల్ బ్యూరో ఆఫ్ ఇన్వెస్టిగేషన్ వేసిన వలలో ఆ పాక్ ఏజెంట్ చిక్కుకున్నాడు. 2020 జనవరిలో అప్పటి అమెరికా అధ్యక్షుడిగా ఉన్న ట్రంప్ ఆదేశాల మేరకు, బగ్దాద్లో అమెరికా సైన్యం ఒక భారీ డ్రోన్ దాడి చేసింది. ఆ దాడిలో ఇరాన్కు చెందిన అత్యున్నత కమాండర్, IRGC లీడర్ ఖాసీం సులేమానీ హతమయ్యాడు. ఆ ఘటన తర్వాత ఇరాన్ రగిలిపోయింది. సులేమానీ హత్యకు కచ్చితంగా ప్రతీకారం తీర్చుకుంటామని ఇరాన్ సుప్రీం లీడర్ అప్పట్లోనే శపథం చేశారు. ట్రంప్ సహా అమెరికా ఉన్నతాధికారులను చంపాలనే ఉద్దేశంతో ఇరాన్ ఒక సీక్రెట్ ప్లాన్ రూపొందించింది. దీని కోసం పాకిస్థాన్కు చెందిన 48 ఏళ్ల అసిఫ్ మర్చంట్ను ఈ మిషన్ కోసం ఎంచుకున్నారు. మతపరమైన యాత్రల కోసం ఇరాన్కు వెళ్లిన మర్చంట్కు, ఓ బంధువు ద్వారా 2022లో యూసుఫ్ మెర్హర్దాద్ అనే IRGC ఏజెంట్తో పరిచయం ఏర్పడింది. అప్పటి నుంచి అతడు స్వచ్ఛందంగా IRGCలో చేరి, ట్రంప్ హత్య కోసం అమెరికా వెళ్లేందుకు ప్రత్యేక ట్రైనింగ్ పొందాడు.
2023 నుంచి సుమారు ఏడాదిన్నర పాటు, అసిఫ్ మర్చంట్ ఇరాన్ రాజధాని టెహ్రాన్లో తన IRGC హ్యాండ్లర్లను ఏకంగా 15 సార్లు రహస్యంగా కలిశాడు. అమెరికా వెళ్లాక సైబర్ సెక్యూరిటీ, నిఘా కెమెరాలు, ఫోన్ ట్యాపింగ్ నుంచి ఎలా తప్పించుకోవాలి? ఎవరితో ఎలా కమ్యూనికేట్ చేయాలనే దానిపై అతడికి కఠినమైన శిక్షణ ఇచ్చారు. ట్రంప్ను ఒక రాజకీయ ర్యాలీ జరుగుతున్న సమయంలోనే హతమార్చాలని, దాని కోసం నేర చరిత్ర ఉన్న మాఫియా సభ్యులను , అమెరికాలోని లోకల్ గూండాలను కిరాయికి మాట్లాడుకోవాలని అతడికి స్పష్టమైన ఆదేశాలు అందాయి. ఈ కుట్రలో తన అంతిమ లక్ష్యం డొనాల్డ్ ట్రంప్ మాత్రమేనని మర్చంట్ విచారణ సందర్భంగా అమెరికా న్యాయ శాఖ ముందు అంగీకరించాడు. 2024 ఏప్రిల్లో ఇరాన్లో వారం రోజుల పాటు గడిపిన అనంతరం, అసిఫ్ మర్చంట్ ఫేక్ రీజన్స్తో అమెరికాకు చేరుకున్నాడు. హ్యాండ్లర్లు చెప్పినట్లుగా, ట్రంప్ను చంపడానికి కిరాయి హంతకుల కోసం వెతకడం ప్రారంభించాడు. ఆ క్రమంలో తనకు ముందు నుంచి పరిచయమున్న ఒక వ్యక్తి సహాయం కోరాడు. కానీ ఆ వ్యక్తి అమెరికాలో ఉగ్రవాద కుట్ర జరుగుతోందని పసిగట్టి, వెంటనే ఎఫ్బీఐ అధికారులకు సమాచారం అందించాడు. అంతే, అక్కడినుంచి ఆ వ్యక్తి ఎఫ్బీఐకి ఇన్ఫార్మర్గా మారిపోయాడు. మర్చంట్కు కిరాయి హంతకులు కావాలని చెప్పి, ఎఫ్బీఐ అండర్కవర్ ఏజెంట్లనే అతడికి పరిచయం చేశాడు. మర్చంట్ వారిని నిజమైన గూండాలుగా నమ్మి ఏకంగా మూడుసార్లు సీక్రెట్ మీటింగ్స్ ఏర్పాటు చేశాడు. తాను విదేశీ శక్తులతో కలిసి పనిచేస్తున్నానని, ఓ పొలిటీషియన్ను చంపేస్తే భారీ మొత్తం ఇస్తానని ఆ అండర్కవర్ ఏజెంట్లకు డీల్ కుదుర్చుకున్నాడు. ముందస్తు చెల్లింపుగా 5,000 డాలర్లు కూడా చేతిలో పెట్టాడు. ఆ డబ్బును విదేశాల్లో ఉన్న తన బంధువుల అకౌంట్ల నుంచి హవాలా మార్గంలో రప్పించినట్లు దర్యాప్తులో తేలింది.
తన పని పూర్తయిందని, ఇక కిరాయి హంతకులు ట్రంప్ను లేపేస్తారని నమ్మిన మర్చంట్ 2026 జూలై 12న అమెరికా నుంచి పారిపోవడానికి సిద్ధమయ్యాడు. టెక్సాస్లోని రిచ్మండ్ ఎయిర్పోర్ట్కు చేరుకుని విమానం ఎక్కబోతున్న సమయంలో ఎఫ్బీఐ అధికారులు అతడిని చుట్టుముట్టి అరెస్ట్ చేశారు. అతడి వద్ద ఉన్న ల్యాప్టాప్, మొబైల్ ఫోన్లు, సోషల్ మీడియా ఖాతాలను పరిశీలించగా కీలక ఆధారాలు లభించాయి. మార్చి 2026లో జ్యూరీ అతడిని దోషిగా నిర్ధారించగా, ఇప్పుడు బ్రూక్లిన్ ఫెడరల్ కోర్టు న్యాయమూర్తి ఎరిక్ ఆర్. కోమిటీ అతడికి 27న్నరేళ్ల జైలు శిక్ష ఖరారు చేశారు. ఈ కేసు తీర్పుపై అమెరికా అటార్నీ జనరల్ టాడ్ బ్లాంచ్ తీవ్రంగా స్పందించారు. అమెరికా నాయకులపై విదేశీ ఉగ్రవాద కుట్రలను తాము ఏమాత్రం సహించబోమని, ట్రంప్ను టార్గెట్ చేసిన ఈ విదేశీ ఏజెంట్కు తగిన శిక్ష పడిందని స్పష్టం చేశారు.



