ఈ పాలు లీటరు రూ. 7 వేలు..అంత ధర ఎందుకంటే..?

మన దేశంలోని హిమాచల్ ప్రదేశ్లో సరికొత్త తరహా వాణిజ్య రంగానికి ఇప్పుడు నాంది పడింది. ఆ రాష్ట్రంలోనే మొట్టమొదటి వ్యవస్థీకృత గాడిదల డైరీ ఫామ్ లాంఛనంగా ప్రారంభమైంది. ఇక్కడ ఉత్పత్తి చేసే గాడిద పాలను లీటరుకు దాదాపు రూ.7,000 చొప్పున విక్రయించాలని ప్రతిపాదించడం ఇప్పుడు దేశవ్యాప్తంగా పారిశ్రామికవేత్తల, రైతుల, సామాన్యుల దృష్టిని ఆకర్షిస్తోంది. హిమాచల్ ప్రదేశ్లోని బిలాస్పూర్ జిల్లా కండ్రోర్ ప్రాంతంలో రాష్ట్రంలోనే మొట్టమొదటి వ్యవస్థీకృత గాడిదల డైరీ ఫామ్ ప్రారంభమైంది. డైరికా ఫార్మ్స్ ప్రైవేట్ లిమిటెడ్ ఆధ్వర్యంలో ఈ వినూత్న కేంద్రాన్ని ఏర్పాటు చేశారు. ఈ ప్రాజెక్టు వ్యవస్థాపకులు సంజీవ్ సింగ్ ఠాకూర్, సీరత్ తూర్ ఈ ఫామ్ను నెలకొల్పగా.. హిమాచల్ ప్రదేశ్ రాష్ట్ర కేబినెట్ మంత్రి రాజేష్ ధర్మాని ముఖ్య అతిథిగా హాజరై దీనిని లాంఛనంగా ప్రారంభించారు. విదేశీ జాతుల వైపు చూడకుండా, స్థానిక ప్రాంతానికి చెందిన అత్యంత ప్రత్యేకమైన స్వదేశీ స్పితి జాతి గాడిదలను పెంచడంపై ఈ డైరీ ఫామ్ లో ప్రత్యేక దృష్టి సారించారు. దీనివల్ల స్థానిక స్వదేశీ జాతి సంరక్షణ జరగడంతో పాటు, నాణ్యమైన పాల ఉత్పత్తికి మార్గం సుగమం అవుతుందని నిర్వాహకులు భావిస్తున్నారు.
లీటరుకు రూ.7,000 వరకు ధర పలకడానికి కారణం గాడిద పాలకు వైద్య, ఔషధ రంగాలతో పాటు.. ప్రీమియం స్కిన్కేర్, అత్యాధునిక సౌందర్య సాధనాల తయారీలో అంతర్జాతీయంగా భారీ డిమాండ్ ఉంది. ముఖ్యంగా నిపుణులు చెబుతున్న వివరాల ప్రకారం, గాడిద పాలలో రెండు అత్యంత విలువైన బయోయాక్టివ్ కాంపోనెంట్లు పుష్కలంగా ఉంటాయి . ఇందులో ఉండే లైసోజైమ్ కాంపోనెంట్ శక్తివంతమైన సహజ రక్షణ గుణాలను కలిగి ఉంటుంది. లాక్టోఫెర్రిన్ కాంపోనెంట్ చర్మ ఆరోగ్యానికి, రోగనిరోధక శక్తికి ఎంతో కీలకంగా పనిచేస్తుంది. ఈ సహజ లక్షణాల కారణంగానే చర్మ సౌందర్యాన్ని మెరుగుపరిచే అత్యంత ఖరీదైన కాస్మెటిక్స్, సబ్బులు, క్రీములు, లోషన్ల తయారీలో గాడిద పాలను ఎక్కువగా ఉపయోగిస్తుంటారు. అంతర్జాతీయ లగ్జరీ బ్యూటీ మార్కెట్లో ఈ పాలకు ఉన్న డిమాండ్ కూడా కారణం. లీటరుకు రూ.7,000 అనగానే చాలామంది ఓ గాడిదల ఫామ్ పెట్టేస్తే కోట్లు సంపాదించొచ్చు కదా అనే ఆలోచన రావచ్చు. కానీ, ఏ కొత్త వ్యాపారంలోనైనా అవకాశాలతో పాటు లోతైన సవాళ్లను కూడా అర్థం చేసుకోవడం చాలా కీలకం. సాధారణ ఆవులు, గేదెలతో పోలిస్తే గాడిదలు ఇచ్చే పాల పరిమాణం చాలా తక్కువ. అంటే ఎక్కువ మొత్తంలో పాలు సేకరించాలంటే నిర్వహణ ఖర్చు, శ్రమ ఎక్కువగా ఉంటాయి. నాణ్యమైన, స్వచ్ఛమైన స్వదేశీ జాతి గాడిదలను సేకరించడం, వాటి ఆరోగ్యాన్ని కాపాడటం అంత సులభం కాదు. గాడిద పాల ప్రాసెసింగ్, అవి పాడైపోకుండా ఎక్కువ కాలం నిల్వ చేయడం, అలాగే అంతర్జాతీయ ప్రమాణాలకు తగ్గట్టుగా శాస్త్రీయ నాణ్యతా పరీక్షలు నిర్వహించడం పెద్ద సవాలే. ఇక ముఖ్యమైనది మార్కెట్. అంత ఖరీదైన పాలను క్రమం తప్పకుండా కొనుగోలు చేసే ఔషధ, కాస్మెటిక్ కంపెనీలతో ఒప్పందాలు కుదుర్చుకుని, సమగ్రమైన మార్కెట్ను ఏర్పాటు చేసుకోవడం అత్యంత కీలకం. ఇక్కడ మరో ముఖ్యమైన విషయాన్ని అందరూ గమనించాలి.. లీటరుకు 7,000 అనేది ప్రస్తుతం ఫామ్ నిర్వాహకులు ప్రతిపాదించిన విక్రయ ధర మాత్రమే. ఈ పాల వాణిజ్యం, ధర స్థిరత్వం, దిగుబడిపై భవిష్యత్తులో మరింత శాస్త్రీయ పరిశోధన, లోతైన మార్కెట్ అధ్యయనం జరగాల్సి ఉందని సంబంధిత వర్గాలు స్పష్టం చేస్తున్నాయి. ఏదేమైనా, సంప్రదాయ వ్యవసాయం, పాడి పరిశ్రమకు భిన్నంగా హిమాచల్ ప్రదేశ్లో ప్రారంభమైన ఈ సరికొత్త ప్రయోగం దేశంలోని ఇతర ఔత్సాహిక పారిశ్రామికవేత్తలను, అగ్రి-స్టార్టప్లను అమితంగా ఆకట్టుకుంటోంది. సరైన శాస్త్రీయ ప్రణాళిక, మార్కెటింగ్ నెట్వర్క్ తోడైతే భవిష్యత్తులో ఇది ఒక అద్భుతమైన ప్రత్యామ్నాయ డైరీ రంగంగా ఎదిగే అవకాశం ఉంది.



