భారత్ ఎదుగుదలను చూడలేకే పాకిస్థాన్ కు ఊతం... డ్రాగన్ అసలు రంగు బట్టబయలు

చైనా మనతో ఎంత స్నేహంగా ఉన్నట్లు నటించినా, దాని అసలు ఎజెండా మాత్రం వేరే అని మరోసారి రుజువైంది. ఆసియాలో వేగంగా ఎదుగుతున్న భారతదేశాన్ని చూసి చైనా ఓర్వలేకపోతోందని, మన ఎదుగుదలను అణచివేయడానికి నిరంతరం కుట్రలు పన్నుతోందని సాక్షాత్తూ అమెరికా కాంగ్రెస్ ప్యానెల్ సంచలన నివేదికను తాజాగా విడుదల చేసింది. యూఎస్-చైనా ఎకనామిక్ అండ్ సెక్యూరిటీ రివ్యూ కమిషన్ తన తాజా వార్షిక నివేదికలో చైనా అసలు రంగును ప్రపంచం ముందు బయటపెట్టింది. ముఖ్యంగా గతేడాది జరిగిన ఆపరేషన్ సిందూర్ సమయంలో చైనా నేరుగా యుద్ధంలోకి దిగకపోయినా, తెరవెనుక నుంచి పాకిస్థాన్కు సైనిక, సాంకేతిక మద్దతు అందించిందని ఈ నివేదిక స్పష్టం చేసింది. అంతేకాదు, భారత్ను అదుపులో ఉంచడానికి జిన్పింగ్ ప్రభుత్వం సరిహద్దుల వెంబడి సైనిక ఒత్తిడిని పెంచుతూ, మరోవైపు పారిశ్రామిక సరఫరాలపై ఆంక్షలు విధిస్తోందని ప్యానెల్ వెల్లడించడం ప్రస్తుతం సంచలనంగా మారింది.
అంతర్జాతీయ వేదికపై భారతదేశం సాధిస్తున్న ఆర్థిక, సైనిక, దౌత్యపరమైన పురోగతి ఇప్పుడు చైనా పాలకులకు కంటిమీద కునుకు లేకుండా చేస్తోంది. ఈ విషయాన్ని యూఎస్-చైనా ఎకనామిక్ అండ్ సెక్యూరిటీ రివ్యూ కమిషన్ తన వార్షిక నివేదికలో అత్యంత స్పష్టంగా ప్రస్తావించింది. ఆసియాలో చైనా ఆధిపత్యాన్ని సమర్థంగా ఎదుర్కోవడంలో భారత్ పాత్ర అత్యంత కీలకమని ఆ వాస్తవం చైనాకు కూడా బాగా తెలుసని అమెరికా ప్యానెల్ పేర్కొంది. అందువల్లే పలు కీలక రంగాల్లో భారత్ను ఎదగనీయకుండా అడ్డుకోవడానికి చైనా నిరంతరం పనిచేస్తోందని నివేదిక తేల్చి చెప్పింది. ఒకవైపు సరిహద్దుల వెంబడి సైనిక ఒత్తిడిని పెంచుతూ భారత్ దృష్టిని మళ్లించే ప్రయత్నం చేస్తుండగా, మరోవైపు భారత పరిశ్రమలకు అవసరమైన పారిశ్రామిక సరఫరాలపై ఆంక్షలు విధిస్తూ ఆర్థికంగా దెబ్బతీయాలని చూస్తోంది. భారత్ ఎదుగుదలను అణచివేయాలనే పెద్ద కుట్రలో భాగంగానే చైనా ఈ చర్యలన్నీ తీసుకుంటోందని అమెరికా కాంగ్రెస్ ప్యానెల్ స్పష్టం చేసింది.



