అబుదాబిలో హై అలర్ట్..యుద్ధానికి ముగింపు పడబోతోందా?

రష్యా, ఉక్రెయిన్ మధ్య జరుగుతున్న సుదీర్ఘ యుద్దానికి ముగింపు పలికే దిశగా ఒక చారిత్రక అడుగు పడుతోంది. అగ్రరాజ్యం అమెరికా మధ్యవర్తిత్వంలో రష్యా, ఉక్రెయిన్ దేశాలు శాంతి చర్చలకు సిద్ధమయ్యాయి. యునైటెడ్ అరబ్ ఎమిరేట్స్ రాజధాని అబుదాబి వేదికగా ఈ అత్యంత కీలకమైన చర్చలు జరగబోతున్నాయి. ఇక రష్యాకు ఫ్రంట్‌లైన్‌లో భయంకరమైన నష్టాలు వాటిల్లుతున్నాయని, ప్రతి రోజు, ప్రతి వారం ఆ దేశం మునుపెన్నడూ లేని విధంగా తన సైనికులను కోల్పోతోందని ఉక్రెయిన్ అధ్యక్షుడు జెలెన్ స్కీ ప్రకటించారు. ఉక్రెయిన్ బలగాలు రష్యాకు అత్యంత సమర్థవంతంగా బదులిస్తున్నాయని, ఈ క్షేత్రస్థాయి విజయాల వల్ల అబుదాబిలో జరగబోయే చర్చల్లో ఉక్రెయిన్ డిమాండ్లకు పూర్తి బలం చేకూరుతుందని జెలెన్‌స్కీ తన వీడియో సందేశంలో స్పష్టం చేశారు. ఈ యుద్ధం ముగియాలని, దానిని రష్యానే స్వయంగా ముగించగలదని ఆయన తేల్చి చెప్పారు. అయితే, అగ్రరాజ్యం అమెరికా రంగంలోకి దిగి రష్యాను ఈ దిశగా ఒప్పించడం లేదా వారిపై ఒత్తిడి తీసుకురావడం ఇక్కడ అత్యంత కీలకమని జెలెన్‌స్కీ అభిప్రాయపడ్డారు. ఉక్రెయిన్ తరఫున ఈ అబుదాబి చర్చల్లో ఫారిన్ ఇంటెలిజెన్స్ అధిపతి రుస్తెమ్ ఉమెరోవ్ ఉక్రెయిన్ ప్రతినిధి బృందానికి నాయకత్వం వహిస్తున్నారు.

ఈ శాంతి చర్చల్లో ప్రధాన ఆకర్షణ అగ్రరాజ్యం అమెరికా పోషిస్తున్న పాత్ర. ఈ ఏడాది జనవరి, ఫిబ్రవరి నెలల్లో ఇరు దేశాల మధ్య భద్రతా సంప్రదింపుల తర్వాత, ఇప్పుడు అబుదాబిలో జరుగుతున్న ఈ మూడో రౌండ్ చర్చలు అత్యంత ప్రాధాన్యత సంతరించుకున్నాయి. అమెరికా తరఫున అధ్యక్షుడు డొనాల్డ్ ట్రంప్ నియమించిన ప్రత్యేక దూతలు స్టీవ్ విట్‌కాఫ్ , జారెడ్ కుష్నర్ ఈ శాంతి చర్చలకు నాయకత్వం వహిస్తూ మధ్యవర్తిత్వం చేస్తున్నారు. యుద్ధభూమిలో నష్టాలతో పాటు, రష్యా ఇప్పుడు ఆర్థికంగా కూడా కొత్త సవాళ్లను ఎదుర్కొంటోంది. ట్రంప్-పుతిన్ డీల్ వార్తల తర్వాత కూడా అమెరికాలోని చమురు వ్యాపారులు రష్యన్ డీజిల్‌ను కొనుగోలు చేయడానికి నిరాకరిస్తున్నారన్న వార్తలు మాస్కోను కలవరపెడుతున్నాయి. భవిష్యత్తులో న్యాయపరమైన చిక్కులు వస్తాయనే భయంతో ఆయిల్ ట్యాంకర్లు వెనక్కి మళ్లుతున్నాయి. ఇవన్నీ రష్యా ఎకానమీపై పరోక్షంగా ఆర్థిక ఒత్తిడిని పెంచుతున్నాయి. కానీ మరోవైపు, ఉక్రెయిన్‌పై రష్యా తన సైనిక దాడులను ఏమాత్రం తగ్గించలేదు. ముఖ్యంగా ఉక్రెయిన్‌లోని జపోరిజియా లాంటి కీలక ప్రాంతాలపై రష్యా డ్రోన్ దాడులు ఉధృతం చేసింది.. అయితే ఈ యుద్ధాన్ని వీలైనంత త్వరగా ముగించకపోతే ఆర్థికంగా తాము కోలుకోవడం కష్టమని పుతిన్ కూడా భావిస్తున్నారు.

ఈ అబుదాబి చర్చల్లో నిజంగానే శాశ్వత శాంతి ఒప్పందం కుదురుతుందా? లేక కేవలం తాత్కాలిక కాల్పుల విరమణ మాత్రమే జరుగుతుందా? అనేది చూడాలి. అటు చైనా అధ్యక్షుడు షీ జిన్‌పింగ్, ఇటు ట్రంప్, పుతిన్ మధ్య భవిష్యత్తులో జరగబోయే అత్యంత భారీ ముక్కోణపు సమ్మిట్‌కు ఈ అబుదాబి చర్చలే ఒక బలమైన పునాది వేయబోతున్నాయని జియోపాలిటికల్ ఎక్స్‌పర్ట్స్ అంచనా వేస్తున్నారు. ఈ భీకర యుద్ధం వల్ల కేవలం రష్యా, ఉక్రెయిన్‌లే కాదు.. ప్రపంచవ్యాప్తంగా తీవ్రమైన ఇంధన, ఆహార సంక్షోభాలు తలెత్తాయి. ఐరోపా దేశాలు కూడా ఈ యుద్ధం ముగింపు కోసం తీవ్రంగా ఎదురుచూస్తున్నాయి. దీనికి నిదర్శనమే, పోలాండ్‌లో ఫ్రెంచ్, బ్రిటీష్ దళాలు కాల్పుల విరమణ తర్వాత ఉక్రెయిన్‌లో బలగాల మోహరింపు కోసం ఇప్పటికే సంయుక్త సైనిక విన్యాసాలు నిర్వహిస్తున్నాయి. అంటే శాంతి ఒప్పందం కుదిరిన వెంటనే, దాన్ని కాపాడటానికి యూరప్ బలగాలు సిద్ధమవుతున్నాయన్న మాట. జెలెన్‌స్కీ చెప్పినట్లుగా యుద్ధభూమిలో విజయాలు చర్చల టేబుల్ వద్ద ఉక్రెయిన్‌కు మేలు చేస్తాయా? లేక పుతిన్ పట్టుదల ముందు ఉక్రెయిన్ తలొగ్గక తప్పదా? ఇవన్నీ ఒక కొలిక్కి రావాలంటే అబుదాబిలో ట్రంప్ టీమ్ ఏ విధంగా పావులు కదుపుతోందనేది చూడాలి.