పుకార్లకు చెక్..ఆ వార్తలు నిజం కాదు..ఫ్యాన్స్‌కు కొరటాల టీమ్ అలర్ట్

దేవర లాంటి భారీ పాన్ ఇండియా మూవీ తర్వాత కొరటాల శివ, బాలయ్యతో సినిమా చేయబోతున్నారనే వార్త టాలీవుడ్‌లో సెన్సేషన్ క్రియేట్ చేసింది. ఒకవైపు కమర్షియల్ మాస్ ఎలిమెంట్స్‌ను పీక్స్‌లో చూపించే బాలయ్య.. మరోవైపు దానికి బలమైన సామాజిక సందేశాన్ని జోడించే కొరటాల శివ.. ఈ ఇద్దరి కాంబినేషన్ అనగానే ప్రాజెక్ట్‌పై అంచనాలు ఆకాశాన్ని తాకాయి. అయితే, ఇంకా సెట్స్ పైకి కూడా వెళ్లని ఈ సినిమా గురించి, ముఖ్యంగా మ్యూజిక్ డైరెక్టర్ గురించి గత రెండు మూడు రోజులుగా సోషల్ మీడియాలో ఒక రేంజ్‌లో వార్తలు ట్రెండ్ అవుతున్నాయి.

ఈ క్రేజీ ప్రాజెక్ట్‌ను టాలీవుడ్‌లో భారీ బడ్జెట్ చిత్రాలను నిర్మిస్తున్న సుధాకర్ చెరుకూరి ఎస్‌ఎల్‌వీ సినిమాస్ నిర్మించబోతోంది. సినిమా అఫీషియల్ అనౌన్స్‌మెంట్ ఇంకా రాకముందే, ఈ సినిమాకు ఫలానా స్టార్ మ్యూజిక్ డైరెక్టర్‌ను లాక్ చేసేశారంటూ నెట్టింట ఒకటే హడావుడి మొదలైంది. బాలయ్యకు అఖండ లాంటి సినిమాతో గూస్‌బంప్స్ తెప్పించే బీజీఎమ్ ఇచ్చిన థమన్ పేరు ఒకవైపు, కొరటాల శివకు దేవర తో బ్లాక్ బస్టర్ ఆల్బమ్ ఇచ్చిన అనిరుధ్ పేరు మరోవైపు సోషల్ మీడియాలో విపరీతంగా వినిపించాయి. వీరిద్దరిలో ఒకరిని ఫైనల్ చేశారని, రికార్డింగ్ వర్క్స్ కూడా మొదలయ్యాయంటూ రకరకాల వార్తలు వైరల్ అయిపోయాయి. నందమూరి ఫ్యాన్స్ కూడా అది నిజమేనేమో అనుకుని సోషల్ మీడియా ప్లాట్‌ఫామ్స్ అయిన ట్విట్టర్, ఇన్‌స్టాగ్రామ్‌లలో తెగ షేర్లు చేసేశారు. ఎవరికి వారు తమకు నచ్చిన మ్యూజిక్ డైరెక్టర్ ఫైనల్ అయ్యాడంటూ ఫ్యాన్ మేడ్ పోస్టర్స్ కూడా క్రియేట్ చేసి ట్రెండ్ చేయడం మొదలుపెట్టారు.

ఈ ప్రచారం రోజురోజుకూ బాగా ఎక్కువైపోవడం, ఫ్యాన్స్ మధ్య అనవసరమైన అంచనాలు పెరిగిపోతుండటంతో చివరకు సినిమా నిర్మిస్తున్న ఎస్‌ఎల్‌వీ సినిమాస్ వాళ్లు, డైరెక్టర్ కొరటాల శివ టీం వాళ్లు అలెర్ట్ అయ్యారు. ఇలాంటి ఫేక్ వార్తలను ఆదిలోనే అడ్డుకోకపోతే సినిమాకు డ్యామేజ్ జరిగే అవకాశం ఉందని భావించి, స్వయంగా రంగంలోకి దిగి ఈ ఊహాగానాలన్నింటికీ ఫుల్‌స్టాప్ పెడుతూ అఫీషియల్ క్లారిటీ ఇచ్చారు. సినిమాకు సంబంధించి బయట వస్తున్న రూమర్స్ ఏవీ నమ్మొద్దని సోషల్ మీడియా వేదికగా చిత్ర బృందం స్పష్టం చేసింది. ముఖ్యంగా మ్యూజిక్ డైరెక్టర్ ఎంపికపై ఇంకా ప్రాథమిక చర్చలు జరుగుతున్నాయని, ఎవరినీ ఇంకా ఫైనల్ చేయలేదని తేల్చి చెప్పారు. దయచేసి ఎలాంటి పుకార్లను ఎంకరేజ్ చేయవద్దని, ప్రాజెక్ట్‌కి సంబంధించిన అన్ని విషయాలు త్వరలోనే తామే అధికారికంగా వెల్లడిస్తామని, అప్పటివరకు ఫ్యాన్స్ కాస్త ఓపిక పట్టాలని వారు కోరారు. దాంతో ప్రస్తుతం వినిపిస్తున్న పేర్లన్నీ ఒట్టి పుకార్లేనని తేలిపోయింది.