మూడు పరాజయాల తర్వాత గెలుపు ఖాతా.. నాలుగో టీ20లో న్యూజిలాండ్ ఘన విజయం

ప్రస్తుతం క్రికెట్ ప్రపంచంలో సంచలనాలు సృష్టిస్తున్న భారత జట్టుకు న్యూజిలాండ్ టూర్‌లో చిన్న అడ్డంకి ఎదురైంది. పర్యటన ఆరంభం నుంచే అద్భుతమైన ఫామ్‌ను కనబరుస్తూ, వరుసగా తొలి మూడు టీ20 మ్యాచ్‌లను గెలుచుకున్న టీమిండియా ఇప్పటికే సిరీస్‌ను కైవసం చేసుకుంది. ఈ నేపథ్యంలో జోరుమీదున్న భారత జట్టు ఆక్లాండ్ వేదికగా కివీస్‌తో జరిగిన నాలుగో టీ20 మ్యాచ్‌లో బరిలోకి దిగింది.చారిత్రాత్మక ఈడెన్ పార్క్ మైదానంలో జరిగిన ఈ పోరులో టాస్ గెలిచిన భారత కెప్టెన్ తొలుత బౌలింగ్ ఎంచుకున్నాడు. చిన్న మైదానం కావడంతో ప్రత్యర్థిని తక్కువ స్కోరుకే కట్టడి చేయవచ్చనే వ్యూహంతో బరిలోకి దిగినప్పటికీ, ఆ అంచనాలు తలకిందులయ్యాయి. కివీస్ బ్యాటర్లు ఆరంభం నుంచే భారత బౌలింగ్ పై ఆధిపత్యం ప్రదర్శిస్తూ మైదానంలో పరుగుల వర్షం కురిపించారు. ఈ భారీ స్కోరు సాధనలో న్యూజిలాండ్ స్టార్ గ్లెన్ ఫిలిప్స్ పవర్ హిట్టింగ్ ఇన్నింగ్స్ ప్రధాన ఆకర్షణగా నిలిచింది. కేవలం 49 బంతులను మాత్రమే ఎదుర్కొన్న ఫిలిప్స్, 6 ఫోర్లు మరియు ఏకంగా 10 సిక్సర్లతో107 పరుగులు సాధించాడు. అతనికి తోడుగా మైఖేల్ బ్రేస్‌వెల్ కేవలం 25 బంతుల్లోనే 4 ఫోర్లు, 6 సిక్సర్లతో విరుచుకుపడుతూ 65 పరుగుల మెరుపు ఇన్నింగ్స్ ఆడాడు.

వీరిద్దరి విధ్వంసానికి తోడు ఫిన్ అలెన్ (31), డారిల్ మిచెల్ (24) రాణించడంతో నిర్ణీత 20 ఓవర్లలో న్యూజిలాండ్ జట్టు ఏకంగా 7 వికెట్ల నష్టానికి 259 పరుగుల భారీ లక్ష్యాన్ని బోర్డుపై ఉంచింది. భారత బౌలర్లలో యువ సంచలనం మయాంక్ యాదవ్ మాత్రమే 3 వికెట్లతో అదరగొట్టగా, అర్ష్‌దీప్, ప్రిన్స్ యాదవ్, నితీష్ కుమార్ రెడ్డి, అక్షర్ పటేల్ చెరో వికెట్ పడగొట్టారు.

ఇక భారీ టార్గెట్ తో బరిలోకి దిగిన భారత్ 20 ఓవర్లలో 9 వికెట్ల నష్టానికి 172 పరుగులు మాత్రమే చేయగలిగింది. తిలక్ వర్మ (35), నమన్ ధీర్ (28), అభిషేక్ శర్మ (27), శ్రేయాస్ అయ్యర్ (22), నితీష్ కుమార్ రెడ్డి (21), ప్రిన్స్ యాదవ్ (18) పరుగులు చేశారు. ఇషాన్ కిషన్ (0), సంజూ శాంసన్ (4) విఫలమయ్యారు. బౌలింగ్‌లోనూ కివీస్ జట్టు ఈ మ్యాచ్ లో అదరగొట్టింది. జాకబ్ డఫీ అత్యధికంగా 4 వికెట్లు తీసి భారత బ్యాటింగ్ ఆర్డర్‌ను కోలుకోలేని దెబ్బతీశాడు. ఆయనతో పాటు మ్యాథ్యూ ఫిషర్, మిచెల్ శాంట్నర్ తలా రెండు వికెట్లు పడగొట్టగా, ఆడమ్ మిల్నే ఒక వికెట్ తీశారు. ఆతిథ్య న్యూజిలాండ్ జట్టు 87 పరుగుల భారీ తేడాతో ఘన విజయం సాధించింది. సెంచరీతో రాణించిన గ్లెన్ ఫిలిప్స్ కు ప్లేయర్ ఆఫ్ ది మ్యాచ్ అవార్డు దక్కింది. ప్రస్తుతం ఐదు మ్యాచ్‌ల ఈ సిరీస్‌లో భారత్ 3-1 ఆధిక్యంలో కొనసాగుతుండగా, సిరీస్‌లోని ఐదవది మరియు ఆఖరిదైన చివరి టీ20 మ్యాచ్ నవంబర్ 1న హామిల్టన్‌లోని సెడన్ పార్క్ వేదికగా జరగనుంది. ఆఖరి పోరులో గెలిచి సిరీస్‌ను ఘనంగా ముగించాలని టీమిండియా భావిస్తుంటే, ఈ గెలుపు జోరును కొనసాగించాలని కివీస్ పట్టుదలగా ఉంది.